• Putarka laya SUPP enggau UPP sebedau PRU14

    Published: Tuesday, 26 December 2017
    A- A+


    KUCHING: Presiden Barisan Nasional (BN) Datuk Seri Najib Tun Razak minta Chairman BN Sarawak Datuk Patinggi Abang Johari Tun Openg mutarka laya dalam entara Parti Rakyat Bersatu Sarawak (SUPP) enggau Parti rakyat Bersatu (UPP) sebedau Pengawa Bepilih Besai Ke-14 (PRU14).

    Najib ti nyadi Menteri Besai, arap bendar Abang Johari ti mega Kepala Menteri ti dikanggau ka iya ‘apai besai’ bisi formula lalu ulih mutarka laya dalam parti nya.

    SUPP diketuaika Presiden iya nya Datuk Dr. Sim Kui Hian, lalu Dato Sri Wong Soon Koh nyadi Presiden UPP.

    “Aku minta ‘apai besai Sarawak’ mutarka pasal SUPP enggau UPP. Kitai bisi formula, aku arap bendar Abang Jo bisi formula dalam runding iya baka ni deka mutarka pekara tu.

    “Kitai deka mutarka tu sebedau PRU14.

    “Lebuh kitai deka nurun beperang, kitai nurun beperang enda tau enda kering sereta patut nyadi siti dalam Barisan Nasional,” ku iya.

    Najib mansutka pekara nya lebuh bejaku seraya bejadika Aum Besai Deligit Parti Ke-24 SUPP ke diatur ba Dewan Sa’ati, Indu Opis SUPP ditu, kemari.

    “Laban deka ke Malaysia kukuh tauka tegap kitai semua enda tau enda beserakup begulai sejalai awakka ulih lebih manah tauka badas,” ku iya bejaku ba semua pengari kaban parti SUPP ke datai ngulu aum nya.

    Bejaku baru Najib arap bendar bepelasarka penyulut parti SUPP ba pengawa bepilih nengeri Ke-11 (PRN11) taun nyin kemari, parti nya ulih ngerampas pulai baru enam ari tujuh sitak ke dipegai Parti Tindakan Demokratik (DAP) maya PRU14.

    Maya PRU13 SUPP diungkupka tujuh sitak tang semina siti sitak ke ulih menang, ku iya, tang ba PRN11 SUPP mujur ngerampas empat sitak iya nya Batu Kawa, Meradong, Repok enggau Piasau.

    Iya ngasaika SUPP diatu bisi penyerakup baru dalam parti nya sereta parti nya amat belajar ari penanggul tauka pekara ke udah nyadi sebedau tu ti meri pengelemi ngagai parti.

    “Sehari tu aku baru ngasaika bisi pemansang positif laban SUPP belajar ari pekara tauka sejarah parti ke udah nyadi. Tadi Dr Sim bisi nyebut parti nyau deka mati, ari peneleba ke nyau deka mati iya nya maya PRU13 SUPP lenyau enam ari tujuh sitak parlimen.

    “Tang laban kita belajar ari peneleba nyau deka mati, selalu iya enti orang bisi peneleba nyau deka mati orang nya deka lebih tegap tauka kering laban enggai mati.

    “Nya alai ngena SUPP baru tu kitai enda tau enda lebih bebendar agi gawa sereta betemu enggau rayat. Kita patut duduk berandau enggau rayat sereta nyeritaka pasal agenda SUPP enggau BN,” ku iya.

    Berebak enggau tu iya madahka, dikena ngenukuka SUPP kering tauka tegap iya nya tiga pekara, keterubah patut bisi perambu; kedua, perambu nya ulih dipejalaika enggau ketiga penyerakup.

    Kelimpah ari nya Najib madahka perintah besai deka besaup enggau perintah nengeri ngeluarka belanja dikena numbuhka tabung belanja mikro.

    “Iya (Abang Johari) mai kunsi aku setuju, nya alai maya Dr Sim minta micro credit, aku meri 50 peratus perintah nengeri meri 50 peratus. Penyampau nganti kitai berunding dulu.

    “Lalu kita minta SJKC Bako dipindahka, ulih, aku setuju sekula nya dipindahka,” ku iya seraya nyaut peminta ari SUPP.

    Sama bisi datai ngagai pengerami bejadika aum nya kemari Abang Johari, Presiden SUPP Datuk Dr Sim Kui Hian, Sapit Presiden SUPP Dato Sri Richard Riot Jaem, Sekretari Besai SUPP Datuk Sebastian Ting enggau ke bukai.-Utusan Borneo

    Subjects:

  • No Comment to " Putarka laya SUPP enggau UPP sebedau PRU14 "