• Kaban PRS dipinta bekerejasama ungkup pemaik komuniti, ku Doris

    Published: Monday, 4 December 2017
    A- A+


    SIBU: Kaban Parti Rakyat Sarawak (PRS) diansak bekerejasama enggau pangan diri ti ungkup pemaik komuniti Dayak.

    Ketuai Indu PRS Dato Sri Doris Sophia Brodie ti mansutka jaku tu, madahka tu dikena nentuka komuniti Dayak ulih sebaka penuduk enggau komuniti bukai di menua tu.

    “Baka ti udah diperatika aku, udah umbas endur kami dalam PRS gawa begulai enggau meruan,” ku iya lebuh bejadika program pelajar, ditu, Hari Minggu tu tadi.

    Program berambaika jaku ‘Empowering Women Through Education’ matak urung 120 iku pesereta. Iya diatur Raban Indu PRS Pampang Dudong, ti diketuaika Donna Petrus Ngelai.

    Sama bisi datai Chairman PRS Pampang Dudong Division enggau kaban supreme kaunsil, Sempurai Petrus Ngelai.

    Ngelansa program nya ku Doris, semina nengah pelajar aja raban indu ulih mansang agi.

    “Pelajar tu pengawa nadai adan laban iya ukai semina pasal akademik aja. Iya pasal pengelandik ngidupka diri lalu tu beguna endar,” ku iya.

    Iya nyemetak madahka, penegap orang indu ukai pekara ti ulih digaga kediri aja laban sida mega begunaka orang bukai enggau sukung sida ke lelaki.

    “Penegap orang indu begunaka sukung enggau kaul sida ke lelaki ti meri kitai peluang laban diatu semua pekara pasal dominasyen lelaki.

    “Kitai begunaka lelaki meri kitai sukung, meri peransang, pengandal enggau ngelala kualiti penempa. Semina ari nya, kitai ulih nyingkang mansang begulai,” ku Doris.

    Kena nyimpul jaku iya, Doris ngansak raban indu anang nangika diri puntan laban ari nya, sida ulih belajar lalu angkat.-Utusan Borneo

    Subjects:

  • No Comment to " Kaban PRS dipinta bekerejasama ungkup pemaik komuniti, ku Doris "