• JPN, JPNS besaup mutar penanggul dokumen pengelala taun baru

    Published: Wednesday, 20 December 2017
    A- A+


    KUCHING: Opis Pengerejista Bansa (JPN) Sarawak deka chakah agi ngemanahka tikas penyulut servis opis nya, baka nempa kerejasama strategik enggau Opis Pelajar Nengeri Sarawak (JPNS) taun baru.

    Menteri Pengintu Pengelantang Pendiau, Pengelantang Raban Bansa, Orang Indu, Ruang Bilik enggau Pemansang Nembiak Mit, Dato Sri Fatimah Abdullah madah, nya ngayanka perintah nengah opis nya chukup ngemeratka rayat nengeri tu ngembuan dokumen pengelala diri ti sah.

    Kerejasama nya dikena ngenukuka penanggul nadai dokumen pengelala diri enggau pengawa laun ngerejista pengada ulih diputarka di nengeri tu.

    “Ba taun 2018, kitai (JPN Sarawak) deka bebendar agi iya nya ngereja pengawa begulai enggau opis pelajar ngelawa sekula primari enggau sekondari.

    “Laban kitai melabaka mayuh nembiak sekula ke ukai status peranak menua tu tauka bedau minta nyadi peranak menua tauka udah minta tang bedau diputuska ketegal apai indai ke nadai dokumen pengelala diri.

    “Kitai enggai nganti sida (mensia mayuh) datai ngiga kitai, tang kitai patut chakah agi gawa ngiga sereta ngenukuka status nembiak, enti udah bisi dokumen diri sida deka nadai penanggul minta bantu sekula sereta pengintu pengelantang enggau bantu ke bukai,” ku iya.

    Fatimah mansutka pekara nya dalam aum pengarang berita pengudah baum enggau raban ari Opis Pengerejista Bansa Sarawak ti dibetuaika direktor opis nya Jasni Jubli, ke diatur ba opis iya di Begunan Baitulmakmur ditu, kemari.

    Berebak enggau tu iya mega madahka dalam taun 2018 JPN Sarawak merambu deka ngemansangka ‘Sistem Anak Angkat Dalam Talian’.

    Proses ngaga surat tauka setipikit pengada anak iru ngena chara online di Sarawak diperambu deka dipejalaika pemadu laun ba bulan Mac 2018, ke alai semua opis JPN di Sarawak ulih ngeluarka setipikit pengada ngena sistem.

    Ke diatu, opis pengerejista bansa agi ngena chara lama tauka manual ke alai peminta ngeluarka enchabut setipikit ngambu semina ulih dikeluarka JPN Kuching aja sereta diproses dalam timpuh sebulan.

    “Kitai udah ngeluarka Standard Operations Procedure (SOP) ke ulih dikena semua opis pelilih menua di nengeri tu taja pan direktor betukar, tu dikena nyeliahka proses ngambu ari nadai atur ke betul,” ku iya.

    Kelimpah ari nya, Fatimah madahka dalam taun 2018 JPN Sarawak mega deka ngemeratka peminta Status Peranak Menua Ari Baruh Pekara 15A, iya nya ungkup ke beumur 21 taun ke baruh.

    Nitih ku Fatimah, kena 5 November 2017 iya ke nyadi Chairman Komiti Khas Status Peranak Menua Ari Baruh Pekara 15A udah baum enggau Sapit Menteri Besai ti mega Menteri Dalam Nengeri, Dato Sri Dr Ahmad Zahid Hamidi ke diatur ditu bekaul enggau peminta Status Peranak Menua Ari Baruh Pekara 15A, Konstitusy en Perintah Besai ti dikenataika komiti khas nya.

    Berindik ari aum ke udah dipejalaika, iya madahka Sapit Menteri Besai minta semua peminta ke udah dikenataika patut diputarka kena 1 Disember 2017.

    “Siti agi penyulut iya nya kena 30 November 2017, Pengerami Nyuaka Surat Pemendar peminta nyadi peranak menua ari baruh Pekara 15A Renggat Nengeri Sarawak udah diatur lalu diberi ngagai 46 iku penerima enda ngira pupu bansa, umur enggau usul rama.

    “Tu ngayanka kitai semua amat beratka pengidup sereta pengelantang anak jemah ila.

    “Nambahka Pekara 15A, taun baru kitai mega dipelabaka deka mekuh ngagai Pekara 19 iya nya bekaul enggau peminta nyadi peranak menua ungkup orang ke beumur 21 taun ke atas,” ku iya.-Utusan Borneo

    Subjects:

  • No Comment to " JPN, JPNS besaup mutar penanggul dokumen pengelala taun baru "