• SBST deka meri pengelantang ngagai penguna: Nancy

    Published: Thursday, 23 November 2017
    A- A+

    KUCHING: Bisi 130 buah bas baru ti efisyen sereta meri pengelantang ngagai penguna kelebih agi di mengeri Kuching deka disediaka perintah nengah Skim Transformasi Bas Henti-Henti (SBST), dalam timpuh setaun ti deka datai.

    Menteri ba Opis Kepala Menteri, Dato Sri Nancy Shukri madahka SBST nya dipejalaika pengudah pemujur nyain sempekat pemereti ati (MoU) entara perintah besai enggau perintah nengeri sereta Konsortium BBK Sdn Bhd (KBBK).

    Perintah besai diarika Ketuai Sekretari Menua Tan Sri Dr. Ali Hamsa lalu KBBK diarika chairman iya, William Chan nyain MoU ti deka bekerejasama bejalaika skim nya.

    Lalu ba pengerami nya mega, Ali mega udah nyain MoU enggau Perintah Nengeri ti diarika Sekretari Perintah Nengeri Tan Sri Datuk Amar Mohamad Morshidi Abdul Ghani ti ngemata enggau matau program nya.

    “Timpuh kitai bejalaika program tu (SBST) iya nya pengelama lima taun enggau ungkus belanja dipelabaka sepenyampau RM240,908,615.40 tauka RM48.18 juta setaun ti mungkur 27 batang jalai.

    “Bisi 130 buah bas baru ti deka disedia tauka disikap enggau kereban Orang Nyelai Pendiau (OKU), Electronic Ticketing Machine (ETM) sereta GPS enggau kamera litar tertutup (CCTV) ngambika ulih dikena enggau efisyen sereta meri pengelantang ngagau penguna servis mensi mayuh kelebih agi di mengeri Kuching.

    “Servis tu dipelabaka ulih dikena magang dalam timpuh setaun ke deka datai. Enti lengkas agi ari timpuh nya manah agi,” ku iya dalam aum pengarang berita.

    Dulu ari nya Nancy ngemataka pengawa nyain MoU entara Perintah Besai enggau Perintah Nengeri sereta Konsortium BBK Sdn Bhd (KBBK) ke diatur ba sebengkah hotel dit, kemari.

    Bekaul enggau bas baru, nya iya madahka had kilometer setaun iya nya urung 10,123,486.80 kilometer, lalu anggar tambang iya nya urung RM4.49 per kilometer sereta pemesai bas baru ti disediaka nya 10.6-12 meter pemanjai ke ulih ngundan kapasiti orang tambang bediri enggau duduk iya nya 55 iku nyengkaum 27 iku orang tambang duduk.

    Batang jalai ke dikelala perintah iya nya ari Barat ke Politeknik Matang; Timur ke Bako; Utara ke Damai enggau Selatan ke Kota Samarahan, ku iya.

    Entara 27 batang jalai ke ditentuka perintah iya nya ari Kuching Sentral - Politeknik Kuching; Kubah Ria - Taman Malihah; Kubah Ria - Kg Sejijak; Kubah Ria - Santubong Cultural Village; Kubah Ria - Kg Santubong; Kuching Sentral - Demak Laut Commercial Centre; Kota Samarahan Bus Terminal - Demak Laut Commercial Centre;

    Ari Kuching Sentral - Kota Samarahan Bus Terminal; Kubah Ria - Demak Laut Commercial Centre (Via Jalan Bako); Kubah Ria - Demak Laut Commercial Centre (via Jln Haji Taha); Bandar Baru Batu Kawa - Samajaya Free Industrial Zone (via Tmn Song); Kuching Sentral - Kubah Ria; Bandar Baru Batu Kawa -Samajaya Free Industrial Zone (via Taman Stapok); Kubah RIa - Samajaya Free Industrial Zone ; Kubah Ria - Kg Stutong; Kubah Ria - Kg Telaga Air;

    Ari Kuching Sentral - Bandar Baru Batu Kawa; Samajaya Free Industrial Zone - Kg Segedup; The Spring City - The Spring City Loop; Kubah Ria – Librari Nengeri; Kubah Ria - Kg Boyan; Bandar Baru Samariang - Kg Boyan; Bandar Baru Batu Kawa - Kubah Ria; Summer Mall - Tmn Sri Tuang; Kota Samarahan Bus Terminal - Kota Samarahan Bus Terminal Loop; Jalan Semaba - Jalan Semaba Loop enggau ari Demak Laut Commercial Centre - Bako.

    KBKK dipilih nyadi operator bejalaika program SBST di nengeri tu ti nyerakupka lima operator besai ke endang udah bisi di mengeri Kuching tu ngambika enda ngeruga servis tauka ngenataika penanggul, ku iya.

    Lebuh bejaku ba pengerami nya, Nancy madahka SBST nyendiaka servis bas ti lebih efisyen ngambika meri penguntung ngagai rayat lebih agi sosio-ekonomi sida.

    “Nya alai aku ngarapka nen gah pengawa bejalaika program SBST di Sarawak tu, rayat deka bulih akses ngagai servis perengka pengangkut mensia mayuh ti manah sereta kurang ari bepanggai tauka pengeran ngembuan perengka pengangkut kediri empu,” ku iya.

    Program SBST nya udah dipadahka YAB Menteri Besai ari baruh ‘Aku Janji’ Perintah Besai ti mungkur lima kandang menua iya nya Kangar, Seremban, Ipoh, Kuching enggau Kuala Terengganu.

    Inisiatif tu dipejalaika dikena meransang penguna perengka pengangkut mensia mayuh ti efisyen enggau penyampau ke patut ngagai rayat, betuaika Suruhanjaya Pengangkutan Awam Darat (SPAD) di Semenanjung Malaysia.

    Lalu di Kuching, betuaika Opis Menteri Besai ti deka dipejalaika nengah Opis Menteri Pemansang Infrastruktur enggau Perengka Pengangkut.

    Sama bisi datai ba pengerami nya kemari, Menteri Muda Perengka Pengangkut Datuk Dr. Jerip Susil, Sekretari Mendam Opis Menteri Pemansang Infrastruktur enggau Perengka Pengangkut Datu Safri Zainuddin enggau ke bukai.-Utusan Borneo 

    Subjects:

  • No Comment to " SBST deka meri pengelantang ngagai penguna: Nancy "