• Aku deka ngamatka semaya diri-Abang Johari

    Published: Friday, 3 November 2017
    A- A+


    KUCHING: Kepala Menteri Datuk Patinggi Abang Johari Tun Openg bepegai ba semaya deka nembuka pengawa ti dikereja Kepala Menteri (ke sebedau tu), niang Datuk Patinggi Tan Sri Adenan Satem, ti deka terus nyaga Sarawak baka ke udah dipesan niang sebedau iya midang pun taun tu tadi.

    “Aku bepegai ba semaya aku deka nyaga Sarawak sereta rayat Sarawak,” ku Abang Johari.

    Jaku tu disebut niang Adenan lebuh Abang Johari enggau Sapit Kepala Menteri, Datuk Amar Douglas Uggah bisi ngabas iya ba Sepital Tungkul Ati di Kota Samarahan ditu.

    Ku iya, “Nya alai, sekeda ari pengawa ke digaga perintah nengeri diatu bepelasarka pengawa niang, lalu tu ke deka ditembuka kami nyengkaum ke baru.”

    Abang Johari madah munyi nya lebuh beejadi program ‘Amanat Integriti Bersama YAB Ketua Menteri Sarawak’ ke diatur bepelasarka rambai jaku ‘Memperkasa Integriti & Tadbir Urus Untuk Pembangunan Mapan’ ti digulu menteri kabinet, Menteri muda, Kaban Kunsil Nengeri (ADUN), pengereja pengawa ba opis perintah, Opis Kandang Menua, nyengkaum sekeda ari parti penyakal, di sebuah hotel ditu, kemari.

    Ba atur pengawa nya, Abang Johari ti mega Menteri Wang sereta Menteri Perambu Ekonomi madahka iya besemaya deka ngangkatka tikas integriti ngagai tikas ke pemadu tinggi ba semua rayat Sarawak.

    “Aku ngasaika rayat Sarawak tu orang ke bisi integriti tinggi lalu ngarapka ulah nya deka nyadi adat rayat nengeri tu.

    “Ninting taun, kitai diaudit sereta nerima ripot audit, lalu naka ke diatu, Sarawak sigi suah nerima pemutus audit ke manah endar. Aku meri puji ngagai pengereja pengawa opis perintah di Sarawak.

    “Integriti tu pekara ke sebaka enggau tanggungpengawa, laban enti kitai betanggungpengawa, pendiau kitai pan likun sereta lantang,” ku iya.

    Nya kebuah pekara integriti tu dipunka ba kabinet nengeri tu dulu ti udah ngangkat sumpah deka ngangkatka integriti sereta ngereja pengawa sida enggau naka pemanah , lalu ngarapka semua ejensi enggau opis perintah deka nunda chara nya.

    Abang Johari nyerumba ke integriti tu sebaka enggau ti b ekaul ti ulih ngubah diri empu nitihka singkang dunya, sereta enda ngereja pengawa ke salah, baka makai suap.

    “Integriti ke nadai disempulang enggau penemu nya lemi, tang enti dikalihka pan, sama enda manah.

    “Tang enti kitai bisi integriti tang enda ngena nya pan sama lemi, laban lebuh kitai manah tang enda bepenemu, kitai pan enda ulih ngemansangka diri.

    “Enti kitai bisi penemu tang nadai integriti, nya pan enda selamat laban penemu nya ulih disalah guna,” ku iya seraya madahka tetiap jalai pengarap bisi ajar ke berega, sebaka sesiku kitai ke bisi tanggungpengawa.

    Nengah awak nya mega, iya ngelalau rayat Sarawak beratika penemu sereta pemansang ekonomi digital enggau chara ke positif.

    “Teknologi tau nyadi platform ke mensia mayuh nyingkang ke mua, tang komuniti dilalau anang salah ngena teknologi. Ambika chunto, enti kitai ngena lunga dikena kitai nyendiaka pemakai, reti nya chara kitai ngena lunga nya enggau tuju ke betul tang dikena enggau tuju ke salah, enda manah mih tuju kitai,” ku iya.

    Sama bisi ngulu atur pengawa nya kemari, bini Abang Johari, Datin Patinggi Dato Juma’ani Tuanku Bujang, Sapit Kepala Menteri, Datuk Amar Douglas Uggah Embas enggau Datuk Amar Awang Tengah Ali Hasan, Menteri di Opis Kepala Menteri (pampang Integriti enggau Ombudsman) Datuk Talib Zulpilip, Sekretari Perintah Menua Tan Sri Datuk Amar Mohd Morshidi Abdul Ghani enggau Speaker Kunsil Nengeri, Datuk Amar Mohd Asfia Awang Nassar.-Utusan Borneo

    Subjects:

  • No Comment to " Aku deka ngamatka semaya diri-Abang Johari "