• Perintah BN Sarawak mayuh kelikuh bekaul tanah NCR

    Published: Tuesday, 24 October 2017
    A- A+


    KUCHING: Parti Bansa Dayak Sarawak Baru (PBDSB) madah Kepala Menteri Datuk Patinggi Abang Johari Tun Openg ngembuan penemu ke bebida ari Sapit Kepala Menteri Datuk Amar Douglas Uggah Embas bekaul Tanah Adat Bansa Asal (NCR).

    Presiden PBDSB Cobbold John mansutka penerang tu beduduk ari jaku ti dipansutka Uggah maya ti ditanya penerang berita bekaul isu NCR lebuh ti bejadi sebengkah pengerami bedau lama tu tadi.

    Uggah ba penerang iya madah, Komiti Pemakai Menua(PM) enggau Pulau Galau(PG) deka mansik dulu kes Tuai Rumah Nyutan ti digerah alah pechara.

    Kort Perintah Besai ngaga pemutus ka alai Kort Besai enda ulih merintah lalu ngemetulka tanah diempu diseliahka ari pajak gadai ke udah diberi.

    “Ba berita tu Uggah madah, pemutus kes tu nyadi pekara baru lalu deka dipansik komiti iya,” ku Cobbold.

    “Tang sebedau tu Abang Johari madah ka reti nyemetak Pulau Galau sereta Pemakai Menua ti bedau diputuska,” ku Cobbold.

    Cobbold madah tu dua iti pekara ka bebida lalu Perintah BN Sarawak niti formula ke salah bekaul isu NCR tu.

    “Salah...formula tu salah. Perintah BN Sarawak enda patut bechuan ka pemutus Kort dalam pekara NCR, laban pemutus Kort nitih ka Sarawak Land Code (SLC).

    “Nya alai, SLC tu ti patut diseruri dikena ngaku Tanah NCR rakyat,” ku Cobbold.

    Iya mega bebula jaku Abang Johari ti madah nadai reti nyemetak Pulau Galau enggau Pemakai Menua.

    Ku Cobbold nambah, tanah menua Sarawak tu semua endang tanah perintah lalu dibagi ngagai dua ke alai tanah ti udah direjista lalu tanah ke empai direjista.

    Tanah ke bedau direjista (nadai pala) tu tanah NCR ke suah nyadi penyarut lebuh disukat nengah Seksyen 6 (kaling kunsi) ke alai perintah BN meri PL nengah Seksyen 28 ngagai kompeni.

    “Abang Johari semina bekedalih. Sida BN diatu megai perintah, lalu udah diberi rayat pengarap. Enda patut kami ba parti Dayak ti dikumbai kita nyamuk nemu agi ari BN?,” ku Cobbold.

    Ba pekara bukai, Cobbold madah ka PBDS Baru udah nyikap chalun sida ti dipelaba ka bediri. Iya mega bisi madah minta PH bebasa ka parti penyakal menua tu lalu anang ngembuan ulah ngemaruhka pangan diri.-UtusanBorneo

    Subjects:

  • No Comment to " Perintah BN Sarawak mayuh kelikuh bekaul tanah NCR "