• KM: Semua jematan baru di Sarawak nadai tol

    Published: Thursday, 26 October 2017
    A- A+


    KUCHING: Kepala Menteri, Datuk Patinggi Abang Johari Tun Openg besemaya semua jematan baru ke benung sereta diperambu digaga ti nyambungka kandang menua di nengeri tu, nadai disediaka tol.

    Abang Johari madah, nya senipak enggau juluk sereta pengawa iya ti nampung legasi Tok Nan, iya nya kepala menteri kelima nengeri tu.

    “Semua jematan ke digaga diatu kitai nadai minta bayar tol, anang kita irau. Tok Nan madahka (nengeri tu) anang ngaga tol.

    “Lalu aku ti nyadi penganti Tok Nan pan enggaika tol digaga (di nengeri tu), semua orang bejalai enggau nadai bebayar,” ku iya.

    Abang Johari ti mega Menteri Pemansang Mengeri enggau Pengeraja Asal mansutka pekara nya lebuh ti bejadika pengerami nasih tanah projek ngaga baru Jambatan Gantung Satok, Kuching ditu, lemai kemari.

    Projek nya digaga dalam timpuh 24 bulan sereta begunaka ungkus belanja urung RM8 juta.

    Lebuh bejaku ba pengerami nya, iya madahka berindik ari nengeri tu ke mayuh sungai dia perintah nengeri deka chakah ngaga jematan di serata nengeri tu dikena nyambung semua kandang menua enggau rayat.

    Nitih ku iya, perintah diatu benung ngaga jematan Bako, jematan semak enggau Emart Matang ti disambung ngagai Sungai Maong lalu ke Batu Kawa dikena ngurangka penyekut jalai ba kandang menua Petra Jaya.

    Jematan Rambungan mega digaga dikena nyambungka Kuching enggau Lundu sereta Sematan kelimpah ari jematan Darul Hana ti meraka sereta nyambungka enggau Bintawa ke benung diperambu, ku iya.

    “Lalu sehari tu kitai ngaga baru jematan ti mayuh sejarah iya nya Jambatan Gantung Satok, Kuching ti gaga dalam taun 1926 sereta runtuh dalam taun 2004.

    “Kebuah kitai (perintah) ke deka ngaga baru jematan tu berindik ari bisi peminta ari mensia mayuh kelimpah ari jematan tu bisi rega sereta sejarah kediri empu sereta ulih narit temuai ari dalam enggau luar nengeri Sarawak laban ke ulih nyambungka enggau Medan Niaga Satok ti nyendiaka mayuh macham pemakai nyelai ke bisi dijual dia.

    “Tang ke pemadu beguna, Jematan Gantung Satok tu nyadika kelai ulih nyerakupka kitai. Kandang endur tu ukai menua Melayu aja, tang kandang metropolitan iya nya ungkup semua pupu bansa,” ku iya.

    Bejaku baru, iya madahka penembu jematan gantung ti digaga baru nya deka nyadika Kuching sebuah mengeri ti manah, bisi perengka guna sereta rayat ulih beserakup lalu nya ulih ngerembaika agi pemansang nengeri.

    Sama bisi datai ba pengerami nya kemari, Menteri Pemansang Infrastruktur enggau Perengka Pengangkut Tan Sri Datuk Amar James Jemut Masing enggau bini iya Puan Sri Corrine Masing, Sekretari Perintah Nengeri Tan Sri Datuk Amar Mohamad Morshidi Abdul Ghani, Menteri Kaunsil Kandang Menua enggau Pengawa Berumah Datuk Prof Dr Sim Kui Hian; Menteri Dagang Temuai, Seni, Main Asal, Nembiak, Lumba enggau Main Datuk Abdul Karim Rahman Hamzah, Menteri Pengintu Pengelantang Pendiau, Pengelantang Raban Bansa, Orang Indu, Ruang Bilik enggau pemansang Nembiak Mit, Dato Sri Fatimah Abdullah Menteri Muda Jalai Tebing Pantai Datuk Julaihi Narawi enggau Menteri Muda Perengka Pengangkut Datuk Dr. Jerip Susil.-UtusanBorneo

    Subjects:

  • No Comment to " KM: Semua jematan baru di Sarawak nadai tol "