• Sibu udah sedia alai ngintu Pengerami Hari Malaysia Renggat Nengeri, 16 Sept

    Published: Tuesday, 12 September 2017
    A- A+


    SIBU: Sitak tu udah besedia alai ngatur pengerami nyambut Hari Malaysia Renggat Nengeri kena 16 September tu ba Dataran Bandar Sibu ditu.

    Menteri Dagang Antarabansa enggau E-Dagang Dato Sri Wong Soon Koh madah, temuai ke dipebasa masa pengerami tu iya nya Tuai Pemegai Menua (TYT) Tun Pehin Sri Abdul Taib Mahmud enggau bini Toh Puan Datuk Patinggi Raghad Kurdi Taib sereta Kepala Menteri Datuk Patinggi Abang Johari Tun Openg enggau bini iya, Datin Patinggi Datuk Juma’ani Tuanku Bujang.

    “Pengerami deka belabuh ari pukul 7 lemai enggau kunsit ari artis tebilang menua tu.

    “Nangkan ke nya, urung pukul 8 lemai, temuai ke dipebasa deka datai lalu disambut enggau Gendang 1Malaysia, ‘Hadrah’ enggau Tanda Singa ari 100 iku nembiak,” pia ku iya madah maya aum media ditu, kemari.

    Sama bela datai maya tu iya nya Menteri Muda Pengawa Berumah enggau Pengerai Mensia Mayuh Dr Annuar Rapaee, Direktor Unit Protokol enggau Kaul Priman Nengeri (UPPAN) Dato Khir Busrah sereta Residen Sibu Hii Chang Kee.

    Ku Wong, program nya deka ditandu enggau tanda bansa asal ti disempulang enggau semua bansa tambai nengeri tu.

    “Udah nya, Abang Johari deka bejaku ba mua mensia mayuh ke bisi datai lalu ditangkan enggau pengawa nyuaka Jalur Gemilang ngagai TYT ari Ketuai Konvoi Nengeri Abang Sardon Abang Hashim sebedau disua ngagai pemesai Soldadu Tasik DiRaja Malaysia (TLDM) sereta digitang lalu disempulang enggau lagu Negaraku,” ku iya nerang.

    Wong mega madah, nangkan ke nya, 300 iku penyereta deka merindang enggau program Malaysia Negaraku ti bepelasarka ulah patriotik.

    Kepenudi ku iya, mensia mayuh deka diperindang enggau pengawa mandangka bungai api.

    Berindik ari nya, iya ngarapka mensia mayuh anang muai awak datai ngerichah pengerami sehari nya dikena ngelai pengangkun diri ngagai menua tu.

    Kelimpah Wong ti nyadi menteri megai pengawa nyadi pengatur pengerami nya, iya mega deka disaup Menteri Muda Orang Indu, Ruang Bilik enggau Pemansang Nembiak Mit Rosey Yunus, Menteri Muda Betanam Betupi Dr Abdul Rahman enggau Dr Annuar.-Utusan Borneo

    Subjects:

  • No Comment to " Sibu udah sedia alai ngintu Pengerami Hari Malaysia Renggat Nengeri, 16 Sept "