• Perengka IT ulih mantu nyungkak ekonomi S’wak

    Published: Monday, 18 September 2017
    A- A+


    SARIKEI: Gempung ekonomi digital, pengawa dagang elektronik (E-Commerce) enggau strategi logistik ke udah diperambu perintah diatu, deka ulih nyungkak ekonomi nengeri Sarawak ngagai tikas positif sereta meruan jemah ila.

    Kepala Menteri, Datuk Patinggi Abang Johari Tun Openg madah, rayat Sarawak patut muka runding sereta sedia nerima ubah pemansang sektor pengawa dagang iya nya nguna perengka teknologi pemadah (IT) ti majak ngerembai sereta diterima kemaya hari tu.

    “Nitih kira rata, pengawa ngena perengka IT, lebih agi telefon pintar diatu chukup mayuh dikena mensia mayuh, dalam ngiga berita pemadu baru nyadika malin sesebengkah pekara.

    “Perintah udah berati dia IT ulih ngerembai enggau jampat sereta ulih nyadi pelasar pemadu manah ngagai raban ti rinduka pengawa dagang dalam ngelakuka produk diri, sekalika ba dalam komuniti tauka ngagai tikas entarabansa.

    “Nya alai, perintah bisi nyendiaka mayuh pelin dikena ngambuh sereta nentuka genap serak raban bansa pintar IT, lalu sebengkah ari nya numbuhka palan

    IT baka ‘Sarikei Innovation Center’ ke mega bisi nyendia mayuh perengka guna ke bukai,” ku iya.

    Abang Johari madah munyi nya rambau Penemuai Rasmi enggau Pengerami Bejadika SIC, ditu kemari.

    Bela bisi dayai ngulu pengerami tu Sekretari Perintah Nengeri Sarawak, Tan Sri Datuk Amar Haji Mohamad Morshidi Abdul Ghani, Menteri Muda Perambu Mengeri, Ngatur Tanah enggau Rampa Menua ke mega Kaban Kunsil Nengeri (ADUN) Kuala Rajang, Datu Len Talif Salleh, ADUN Repok, Dato Sri Huang Tiong Sii, Menteri Muda ba Opis Kepala Menteri (Pekara Korporat), Abdullah Saidol sereta sekeda temuai ke bukai.

    Sarikei Innovation Center iya nya sebengkah palan ti nyendiaka mayuh bengkah servis ungkup mensia mayuh nyengkaum perengka IT, ruang bedagang, dewan mit, bilik aum, ruang belelak enggau mayuh perengka bukai lebih agi ungkup raban ti baru ngujika diri ba pengawa dagang.

    SIC di Sarikei nyadi ke lumur dua ditumbuh ba nengeri tu, lalu iya nguna ungkus belanja RM3 juta dikena ngaga palan nya.

    Nitihku Abang Johari, penumbuh palan baka SIC di Sarikei tu endang sebagi ari juluk perintah dikena ngelai pengawa meri sukung ngagai industri Halal Hub enggau Koridor Kuasa Dikena Baru Sarawak (SCORE) ke benung dikemansang ba Tanjung Manis.

    Ku iya, nyema deka meda produk iya dikelala ba serata dunya, nyadi sektor ekonomi digital tu patut dipejalarka beamai-amai.

    “Juluk kitai sehari tu iya nya deka meda Sarawak enggau Sarikei, nyadi sebengkah Palan Tibang Pemakai Sarawak lalu berebak enggau nya terus angkat mansang.

    “Kelimpah nya mega, perintah udah ngemendarka 500 ekar tanah ungkup Agro Park ba sitak Sarikei awakka disuwa ngagai orang ti bisi ati deka ngemansangka bidang agrotani.

    “Tanah-tanah nya deka dibagi lalu ngagai blok-blok awak dikemansang barang sapa ke deka.

    “Tuju iya dikena nentuka aktiviti Agrotani ba sitak tu terus mansang sereta begempung enggau Agropolitan Bukit Sadok ke benung dikemansang,” ku terang Abang Johari.

    Berebak enggau nya, ku iya perintah ngarapka Sarawak ulih nyadi pengeluar produk pemakai ngagau dunya manggai taun 2030 sereta ngurangka pengawa ngimport pemakai ari luar ke beungkus RM7 billion ninting taun.

    Berebak enggau nya, Abang Johari begulai enggau raban iya bisi nemuai ngagai taba Sarikei Mini Maha ke diatur ba Tanah Laman Dewan Suarah Sarikei.-Utusan Borneo

    Subjects:

  • No Comment to " Perengka IT ulih mantu nyungkak ekonomi S’wak "