• Bisi chalun indu deka ngarika PRS ba PRU14

    Published: Friday, 8 September 2017
    A- A+


    KUCHING: Parti Rakyat Sarawak (PRS) udah nganjung nama chalun ngagai renggat tinggi Barisan Nasional (BN), dikena napi Pengawa Bepilih Besai Ke-14 (PRU14), ke diatur sebarang maya.

    Presiden PRS ti mega Sapit Kepala Menteri Tan Sri Datuk Amar Dr James Jemut Masing madahka nama chalun nya bisi nyengkaum chalun indu.

    “Semua udah (nganjung nama) lalu kami PRS udah besedia, enda ngira maya Menteri Besai madahka kemaya (PRU 14 diatur) kami endang udah besedia.

    “Kami bisi chalun indu tang aku enda ulih madah dulu (ngagai pengarang berita),” ku iya lebuh dirandau raban pengarang berita pengudah ngulu sebengkah pengerami ditu, kemari.

    Berebak enggau tu lebuh ditanya sekalika bisi penyandang parlimen parti nya diketuka tauka orang baru, Masing madahka;

    “Kami semina bisi enam sitak, dini engkah chalun baru, (tentu) bisi orang patut diganti, kelimpah ari kami diungkupka tujuh sitak,” ku iya.

    Dulu ari nya Masing ngulu aum pengarang berita 10th Sarawak Amateur Masters Open Golf Championship 2017 ke diatur Kesatuan Golf Sarawak (KGS) ba sebengkah hotel ditu.

    Kelimpah ari nya, Ketuai Indu PRS Datuk Seri Doris Sophia Brodie madahka Indu PRS udah nganjung nama chalun indu ke diperambu ba semua enam sitak parlimen ngagai parti, nyerumba PRU 14.

    Doris ti mega Sekretari Politik ngagai Kepala Menteri madahka raban indu tauka indu Dayak nyengkaum dalam parti mayuh pandai sereta bisi pengelandik nyadi ketuai.

    “Indu PRS udah nganjung nama ke diperambu nyadi chalun, kami bisi nama indu ungkup semua enam sitak parlimen, laban kitai enda nemu sapa ke ditukar nyema bisi.

    “Lalu nyema bisi betukar, kami (Indu PRS) udah bisi sedia nama chalun indu ba semua sitak ke diarika, sereta tu dikena nunjukka ngagai parti kami (Indu) bisi chalun indu ke pandai tauka nemu enda ngira bagi sitak,” ku iya lebuh dirandau raban pengarang berita ba pengerami ke sebaka.

    Berebak enggau tu ditanya nyema iya empu seiku ar dichalun nya, Doris madahka peluang nya patut diberi ngagai orang baru.

    Doris bepenemu iya ke udah dua penggal iya nya pengelama enam taun meri servis dalam parlimen nengah pengawa iya ke nyadi senator ba Dewan Rakyat, patut meri peluang ngagai orang baru.

    “Terus terang aku madah, aku nadai perambu deka nyadi chalun sitak parlimen laban aku udah meri servis penuh dalam parlimen iya nya dua penggal tauka enam taun, aku ngasaika kitai patut meri peluang ngagai orang baru,” ku iya madahka penemu diri.

    Sebedau tu Masing kala udah madahka parti nya deka milih chalun indu bediri minta pilih PRU 14.

    PRS diungkupka enam sitak parlimen iya nya sitak Julau ti disandang Datuk Joseph Salang Gandum, Selangau (Datuk Joseph Entulu, Sri Aman (Datuk Masir Kujat), Lubok Antu (William Nyalau), Kanowit (Datuk Aaron Ago Dagang) enggau Hulu Rajang (Datuk Wilson Ugak Kumbong).-Utusan Borneo

    Subjects:

  • No Comment to " Bisi chalun indu deka ngarika PRS ba PRU14 "