• Beleman mali: Anang malu ngaga ripot polis nyema kala kena pasung

    Published: Monday, 11 September 2017
    A- A+


    KUCHING: Sida ke kala kena penusah beleman mali sereta kena pasung patut berani ngeripot penusah ke nyadi ba sida ngagai polis.

    Menteri Pengelantang Pendiau, Komuniti, Orang Indu enggau Pemansang Anak Mit, Dato Sri Fatimah Abdullah madah ngeripot penusah nya berat ngambika orang ke ngaga pengawa salah nya ulih di ukum sereta dipechara.

    “Ba pemayuh kes beleman mali tu, sigi pedis endar mangsa nya ngeripot ngagai polis tauka opis ke megai kuasa laban suah endar kes baka tu, malut diri sebilik.

    “Taja pia, penusah tu enda ulih di iyarka baka nya aja, nya alai kami ngelalau mensia mayuh kelebih agi sida ke kena penusah bansa tu ngeripot ngagai polis tauka opis ke megai kuasa.

    “Pekara tu berat endar laban enti orang ken gaga salah nya enda di ripot kita, sida iya lepas bansa nya aja lalu nyangka sida iya ngeripit baru pengawa salah sida iya,” ku Fatimah.

    Iya madah munyi tu lebuh dikerandau pengudah nyempulang Tuai Pemegai Menua (TYT) Sarawak Tun Pehin Sri Abdul Taib Mahmud ngelawa Pengawa Pemandang Raja Kitai Enggau Dirgahayu di Atrium Plaza Merdeka, ditu, kemari.

    Iya mega madahka, kes beleman mali di menua tu udah datai ba tikas ke balat endar ari bulan Ogos tu tadi.

    Taja pia, beratika mayuh sereta suah ripot bansa tu diripotka, mandangka kes ke ninggang sida ke kena penusah tu, udah nemu reti sereta enda takut ngeripot penusah ke nyadi ba sida iya.

    Berindik ari penusah ke nyadi bansa tu, iya madah, opis menteri sida iya begulai enggau ijinsi bukai deka majakka pengawa meri penemu sereta nyendiaka palan ke mensia mayuh ngambika sida iya berani ngeripot utai ke nyadi ba sida iya.

    “Diatu mensia mayuh sereta sida ke kena penusah tu majak arap ke opis ke megai kuasa ke ulih alai sida iya ngeripot penusah ke nyadi ba sida iya.

    “Tiap penusah ke nyadi, beleman mali tauka kena pasung enda taun enda di ripot ngambika orang ke ngaga penyalah nya ulih kena ukum.

    “Nya alai, pemerai ngeripot pengawa salah bansa tu berat lalu seiak kami, deka majakka pengawa kami meri penemu lalu beratika tiap pengawa salah bansa tu enda tau enda di ukum lalu dibechara, ngambika kes pasung tauka beleman mali ulih dikemutar enggau manah,” ku iya.

    Ba lansa bukai, Fatimah madah opis menteri sida iya deka baum (Opis Kunsil Orang Indu enggau Ruang Bilik) begulai enggau ijinsi bukai nyengkaum polis bejuraika kes beleman mali sereta pasung ke ngirauka ati di menua tu.

    “Kami beratika kes beleman mali tu majak nambah bulan tu, tang kediatu, kami nganti polis bejuraika pekara tu meda ari sukut statistik tauka penyampau dibanding enggau taun siti nyin tadi,” ku iya.-Utusan
    Borneo

    Subjects:

  • No Comment to " Beleman mali: Anang malu ngaga ripot polis nyema kala kena pasung "