• Sepuluh peratus ekuiti Petronas tetap dibeli Sarawak

    Published: Thursday, 10 August 2017
    A- A+

    KUCHING: Sarawak tetap meli ekuiti sepuluh peratus sebagi ari MLNG Train 9, lalu pekara tu udah ditetapka Petronas.

    Kepala Menteri Datuk Amar Abang Johari Tun Openg madah naka ke diatu, Sarawak deka berunding enggau Petronas ba penyampau rega ekuiti (10 peratus) ke deka dibeli Sarawak.

    “Sarawak udah netapka diri deka meli 10 peratus ekuiti ari MLNG Train 9, lalu pekara tu udah ditetapka Petronas, semina diatu perintah nengeri benung berundingka rega ke dipesetuju kededua piak, berapa penyampau rega ke deka dijual Petronas ngagai Sarawak,” ku Abang Johari.

    Iya madah munyi nya lebuh dikerandau pengarang berita pengudah bejadika ‘International Conferences on Language Studies 2017’ ti diatur UNIMAS di sebuah hotel ditu, kemari.

    Abang Johari mega nyaut tanya ari Sapit chairman Parti Keadilan Rakyat (PKR) See Chee How ke minta perintah nengeri minta penerang ari Petronas bekaul enggau perambu nyual 10 peratus ekuiti Petronas LNG9 Sdn Bhd ke ngempu Projek MLNG Train 9,ngagai sebuah kompeni minyak menua Thailand sereta kaul enggau PTTGL Investment Ltd (PTTGLI) ke berega USD500 juta (RM2.14 billion).

    Pekara meli ekuiti tu ku See, patut diputarka dalam kandang tiga taun ke udah lebuh ex-Kepala Menteri, niang Datuk Patinggi Tan Sri Adenan Satem setuju meli ekuiti nya, tang nyau udah ngelebus tiga taun, pekara tu lalu bedau diputarka.

    See mega madahka Kepala Menteri patut meri timpuh ngagai Petronas ngaga ‘Shareholders Agreement’ enggau Sarawak pasal 10 peratus ekuiti ba MLNG Train 9 nya.

    Iya nanya nama kebuah Perintah Nengeri Sarawak lubah endar (udah tiga taun) mutarka 10 peratus ekuiti nya enggau Petronas nengah projek MLNG nya di Bintulu, tanya See.

    Sepuluh peratus ekuiti tu kala dibantaika Petronas dalam bulan Ogos 2014, ke diterima niang Adenan tekala nya tang udah ngelebus tiga taun, pekara nya lalu bedau diputarka, ku iya.

    Entara bulan Jun 2014 nyentuk ke diatu, Petronas udah nyual 10 peratus ekuiti sida ba Train 9 ngagai sebuah kompeni Jepun, JX Nippon Oil & Energy (JX Nippon) (kelimpah ari 10 peratus ngagai kompeni miyak enggau gis ari Thailand, PTTGLI) lalu Petronas empu agi bisi 80 peratus ekuiti agi tinggal.

    Ari 80 peratus ti diempu Petronas, Sarawak patut ngembuan ekuiti 10 peratus ari penyampau nya (80 peratus).

    Projek MLNG 9 entara rintai industri minyak enggau gis ke pemadu besai bepalan di Bintulu.-Utusan Borneo Online

    Subjects:

  • No Comment to " Sepuluh peratus ekuiti Petronas tetap dibeli Sarawak "