• Nazri patut nerangka pasal chukai dagang temuai

    Published: Friday, 18 August 2017
    A- A+


    KUCHING: Menteri Dagang Temuai, Seni, Main Asal, Nembiak enggau Lumba enggau Main, Datuk Abdul Karim Rahman Hamzah tegap enggau penemu iya ngangau sereta minta Menteri Dagang Temuai enggau Main, Asal Datuk Seri Nazri Aziz ngayanka basa ngagai nengeri tu ke enggau numbuhka Malaysia ngena chara nerangka pasal atur agih chukai dagang temuai ke deka dipejalaika 1 September tu.

    Karim ti madahka diri nadai perambu deka betemu enggau Nazri tang ke patut ku iya, Nazri datai ke Sarawak lalu betemu sereta nerangka ngagai Kepala Menteri (KM) Datuk Amar Abang Johari Tun Openg enggau rayat nengeri tu.

    “Nuan (Nazri) anang ngarapka aku ngelawa sereta betemu enggau nuan kia (Kuala Lumpur), nuan ke patut datai kitu (Sarawak) lalu bebasaka kami, datai kitu lalu betemu enggau Kepala Menteri sereta padahka kebuah nama nuan ngaga atur baka nya(chukai dagang temuai).

    “Iya (Nazri) enda patut ngaga Sarawak baka iya ke ngaga nengeri bukai di Malaysia, kitai (Sarawak) enggau numbuhka Malaysia. Tiga bagi menua ke numbuhka Malaysia iya nya Sabah, Sarawak enggau Semenanjung, laban asal iya menua Singapura enggau tang udah narit diri.

    “Nadai pematut aku betemu enggau iya kin, aku semina nyaga rayat Sarawak aja,” ku iya lebuh ditanya sekalika iya deka betemu enggau Nazri bekaul enggau isu chukai dagang temuai nya.

    Dulu ari nya Karim meri penerang dalam aum pengarang berita bekaul enggau TEDx Kenyalang ke diatur ba bilik baum Opis Menteri nya di Begunan Baitulmakmur ditu kemari.

    “Diatu aku ulih bejaku baka tu, aku udah lebih 100 hari, dua hari ke udah aku manggai 100 hari megai pengawa tu (Menteri Dagang Temuai, Seni, Main Asal, Nembiak enggau Lumba enggau Main), sebedau tu aku agi belajar,” ku iya ketawa seraya madahka diri deka nyambut penatai menteri nya di padang bilun enti datai ke nengeri tu.

    Karim dalam aum pengarang berita ensanus, bekaul enggau isu nya madahka diri enda begilik penemu sereta tetap minta 30 peratus ari asil ke digumpul ari chukai dagang temuai.

    Peminta nya udah dipesetuju Sarawak enggau Sabah dalam memorandum ngagai perintah besai.

    Sabah enggau Sarawak sebedau tu enda setuju ba asil pedua RM1 ari tetiap RM10 baka ke ditetapka dalam atur chukai baru nya.

    Berengkah 1 September ke deka datai tu, temuai ari menua luar deka mayar RM10 ke suwa bilik hotel di serata menua ti digumpul Opis Kastam Diraja Malaysia.-Utusan Borneo

    Subjects:

  • No Comment to " Nazri patut nerangka pasal chukai dagang temuai "