• Zahid: Tanka Masir nyadi chalun BN sitak Sri Aman

    Published: Friday, 14 July 2017
    A- A+


    SRI AMAN: Sapit Menteri Besai Datuk Seri Dr Ahmad Zahid Hamidi dekaka sapit iya ba Opis Menteri Dalam Menua,Datuk Masir Kujat ditanka nyadi chalun Barisan Nasional (BN) ba Pengawa Bepilih Besai ti deka datai.

    Iya ke mega Menteri Dalam Menua (KDN) madah pekara nya deka dikenatai ngagai Kepala Menteri Datuk Amar Abang Johari Tun Openg enggau Presiden Parti Rakyat Sarawak (PRS) Tan Sri James Masing.

    “Naka ke diatu aku puas ati enggau pengawa ke udah dikereja Masir nyadi Sapit Menteri Dalam Menua.

    “Semua surat tauka projek ke dipinta Masir sigi dikemendar aku ngelama tu.

    “Aku deka nelai presiden parti iya, ngenanka iya baru nyadi chalun BN ba penuduk parlimen Sri Aman,”ku iya ba pengerami Ramah Tamah Aidilfitri KDN ke diatur di Padang KPSU Lama ditu, kemari.

    Nambahka nya, Zahid madah enti Masir ba pengawa bepilih nya ila menang nengah majoriti ke besai, mayuh agi projek pemansang deka dibai ke Sri Aman.

    Dulu agi ari nya, Zahid ngansak rayat Sri Aman meri sukung ngagai Perintah BN sereta chalun BN.

    “Kitai bisi perintah ke tegap di Putra Jaya, kitai mega bisi perintah ke tegap di Kuching ke alai di serata Sarawak kitai bisi raban pengari rayat ke manah.

    “Rayat patut meri sukung ke tegap ngagai sida ketegal ti udah nyaup ngeringka perintah sereta mai pemansang ngagai kandang endur.

    “Kereja kami ngiga belanja sereta meri pemansang,”ku iya seraya madah rayat Sarawak udah meri sukung ke tegap ngagai BN ti betuaika Abang Johari.

    Ngenang kaul bukai, Iya madahka perintah BN seruran beratka pemaik enggau pengelantang rayat.

    Bechunto kes sakit rabies, iya madah perintah nengeri enggau perintah besai besaup mutarka kes nya.

    “Perintah nengah Opis Menteri Pengerai naka ke diatu udah nyendia tuchuk vaksin ngagai lebih 1300 iku orang.

    “Tajapan tuchuk nya mar, tang pekara nya dikemerat ungkup pengelikun rayat,”ku iya.

    Ba pengerami kemari, Zahid bisi nyuaka geran gerempung genturung pendiau nengah inisiatif nempa kandang endur ke likun penyampau RM10,000 ngagai sekeda gerempung.-Utusan Borneo Online

    Zahid mega nyuaka surat penerang pengelala diri ngagai 11 iku penerima di Sri Aman.

    Subjects:

  • No Comment to " Zahid: Tanka Masir nyadi chalun BN sitak Sri Aman "