• Saup ari pengari rayat beguna endar, ku Manyin

    Published: Tuesday, 11 July 2017
    A- A+

    SIBU: Opis Menteri Pelajar, Sains enggau Pansik Teknologi udah nganjung jaku tesau ngagai semua pengari rayat baikka ari perintah tauka penyakal ngiru sebuah tauka lebih ari sebuah sekula ba tuju nyungkakka agi pengelandik nembiak sekula primari enggau sekondari landik bejaku English.

    Menteri ba opis menteri tu Datuk Sri Michael Manyin Jawong madah, saup ari pengari rayat tau bendar bejadika juluk ati nya dikena nentuka Jaku English ulih dikena nembiak di sekula ninting hari.

    “Kelimpah ari nya, opis menteri kitai nengah Opis Pelajar mega udah berengkah ngatur beberapa bengkah chara nyengkaum nyempulang Jaku English ba tiap iti papan pal ba sekula ngambika nembiak semampai meda jaku nya lalu enggau automatik sida berengkah nyebut sereta belajar bejaku.

    “Bala kepala pengajar enggau prinsipal bela diperansang ngena Jaku English maya bisi gempuru sekula kelimpah nentuka bala nembiak enggau pengajar semampai berandau ngena nya,” pia ku iya maya bejadi Pengerami Bejadi Blok Baru Sekula Tinggi Katholik ditu, kemari.

    Iya maya tu ngarika Kepala Menteri Datuk Amar Abang Johari Tun Abang Openg.

    Taja pan baka nya, Manyin madahka pengeransing tu ukai reti deka ngemaruhka tikas Bahasa Malaysia ba nengeri tu.

    “Semua tu dikena kitai meransang bala nembiak landik agi bejaku English,” ku iya madah baru.

    Iya mega madah, nembiak ke salah ngena Jaku English enda tau dipejah laban pengujung iya ila sida deka landik ngemetuka jaku nya kediri empu.

    “Kediatu ke beguna iya nya kitai meseti meransang sida bejaku ngena Jaku Englsih enda ngira sida salah nyebut tauka betul.

    “Semua chara ke digaga kitai tu dikena ngembing sida berengkah ngena lalu landik bejaku English,” pia ku iya madah.

    Manyin ngarapka inisiatif opis menteri iya nya ulih disungkung semua nyengkaum pengari rayat ba nengeri tu.

    Sama bela datai maya pengerami tu iya nya Menteri Muda Pelajar enggau Pansik Teknologi ti mega Kaban Kunsil Nengeri (ADUN) Nangka Dr Annuar Rapa’ee, pengari Chairman Opis Direktor sekula nya Tan Sri Tiong Hiew King, ADUN Dudong Datuk Tiong Thai King, Residen Sibu Hii Chang Kee enggau Prinsipal Brother Anthony Tay Woon Dwu.-Utusan Borneo Online

    Subjects:

  • No Comment to " Saup ari pengari rayat beguna endar, ku Manyin "