• Pengelikun rumah sereta ngurangka kes bebadi ba jalai alun objektif Ops Selamat

    Published: Tuesday, 20 June 2017
    A- A+


    KUCHING: Ops Selamat 11/2017 pengelama 15 hari berunggu udah berengkah 18 Jun tu tadi lalu deka ngetu kena 2 Julai 2017 nyerumba pengerami Hari Raya 2017 dilanchar kemari.

    Pengawa ngelanchar operasyen tu dikemujur Ketuai Polis Sarawak Datuk Mazlan Mansor di Kuching Sentral ditu, kemari.

    Ba aum pengarang berita pengudah pengawa ngelanchar, Mazlan madah ops serak tu meratka pengawa nyeliah penyalah nyerungkai rumah ke ditinggal sereta ngurangka penusah di jalai alun.

    “Tuju kitai iya nya nerenak pemereti kelebih agi ba pekara pengelikun maya bebaikka perengka pengangkut.

    “Ops mega deka nentuka rumah ke ditinggal seruran likun. Dikena nentuka semua nya mujur dijapai kitai begunaka kerejasama ari mensia mayuh.

    “Tinggalka pesan ngagai orang sepiak rumah tauka ngisi pom ninggalka rumah ke bisi disedia ba balai polis besemak,”ku Malan.

    Pekara ke pemadu berat ku iya nambah, orang bebaika perengka pengangkut meseti bebasaka undan-undang jalai alun.

    Manah pan jalai enti enda nitihka undang-undang sereta berumban, penusah sigi deka nyadi, tandu Mazlan.

    Ngenang kaul ke sama, iya netapka statistik kes nyerungkai rumah enda niki munyika tuduh.

    Sekeda kes ke nyadi ku iya ketegal pengilap orang bempu rumah ti enda kiruhka pengelikun rumah diri.

    Ba pengawa kemari, Mazlan bisi mega ngelepas Tim Pematau Ops Selamat 11/2017 ti dipasuk PDRM, Opis Pengangkut Darat(JPJ), Bomba enggau Opis Pengerai.-Utusan Borneo Online

    Subjects:

  • No Comment to " Pengelikun rumah sereta ngurangka kes bebadi ba jalai alun objektif Ops Selamat "