• Kaban SUPP Krokop nyikap diri napi PRK DUN Pujut

    Published: Wednesday, 14 June 2017
    A- A+


    MIRI: Parti Sa’ati Rayat Sarawak (SUPP) Pampang Krokop nyikap semua kaban parti ke mega pengundi berejista dikena napi Pengawa Bepilih Mit (PRK) Kunsil Nengeri (DUN) Pujut.

    Menteri Muda Dagang Temuai, Seni enggau Main Asal, Datuk Lee Kim Shin madahka sebengkah program merarau enggau randau begulai enggau Presiden SUPP deka diatur kena 18 Jun ti deka datai.

    “Kena nyediaka diri tumu napi PRK Pujut, lima pampang SUPP di Miri deka ngaul semua kaban nyengkaum ngatur randau enggau Datuk Dr Sim Kui Hian kena Hari Minggu tu,” ku iya rambau aum pengarang berita ditu, kemari.

    Lee madahka program ke sama kala diatur SUPP Pampang Pujut, lalu sekali tu SUPP Pampang Krokop deka ngatur pengawa ke sama nyidi semua kaban ti rejista.

    “Tu seiti ari pengawa kitai ngaul semua kaban SUPP laban di Miri aja kitai bisi lebih 20,000 iku kaban diau di kandang mengeri Miri sereta ulih ngundi,” ku iya.

    Iya nesau semua kaban SUPP pampang Krokop datai ngulu program merarau Hari Minggu tu di Restoran Bouleverd Miri.

    Surat kangau ku iya udah disadung ngagai bala kaban SUPP Krokop, taja pia sida ti nadai nerima surat tau datai terus ngagai restoran nya.

    Ku iya, SUPP Miri bisi lima pampang iya nya Pujut, Piasau, Senadin, Lambir enggau Sibuti.

    “Kitai udah berengkah nyikap kaban SUPP Miri kenyau ari 4 Jun tu tadi nentuka semua kaban ti ulih ngundi lalu kitai udah sedia napi PRK Pujut,” ku iya.

    Lee mega ngingatka mengeri Miri kala nyadi kubu kuat Barisan Nasional (BN) sereta Miri mega ti dulu suba pasar mit berubah ngagai mengeri besai dalam taun 2005.

    “Kitai ngarapka pengundi nikalka kenang pemanah pengawa BN ti udah mayuh ngubah Miri nyadi mengeri besai ti mansang,” ku iya nandu.

    Sama bisi datai Datuk Bandar Miri Adam Yii, Chairman Pengatur Alex Kho sereta Pemantu Khas Menteri Muda Dagang Temuai, Seni enggau Main Asal Erick Chin.-Utusan Borneo Online

    Subjects:

  • No Comment to " Kaban SUPP Krokop nyikap diri napi PRK DUN Pujut "