• PBB Pampang Batang Lupar seruran sedia napi PRU14

    Published: Tuesday, 18 April 2017
    A- A+

    KUCHING: Penyandang kerusi Parlimen Batang Lupar Dato Sri Rohani Abdul Karim madah, Parti Pesaka Bumiputera Bersatu (PBB) di sitak nya sigi seruran sedia napi Pengawa Bepilih Besai PRU ke-14 ke deka datai.

    Rohani ti mega nyadi Menteri Pemansang Orang Indu, Ruang Bilik enggau Komuniti lebuh ditanya sekalika bisi chalun bukai ungkup sitak Batang Lupar dia iya nyaut :

    “Engka bisi empat ngagai lima nama ditaga ungkup sitak Batang Lupar, tang pengawa nya digaga Opis Pekara Khas (JASA),”ku Rohani lebuh dirandau pengudah bejadika ‘Anjung Kasih’ di Sepital Besai Sarawak (HUS) ti dipenyadika Tuai Pemegai Menua (TYT) Sarawak Tun Pehin Sri Abdul Taib Mahmud, kemari.

    Ba pengawa iya ngabas rayat, endang nadai ngetu ukai semina ketehal PRU ke-14. Pengawa tu dikereja begulai enggau pating PBB sereta komiti BN ke bukai.

    “Kitai pan enda nemu ni maya PRU ke-14 deka digaga, tang manah kitai seruran ngelalau sida di sitak aku empu, madahka enda lama agi PRU ke-14 lalu patut udah besedia.

    “Kitai di Sarawak muntang mimit laban bedau lama tu ke udah (tengan taun 2016) kitai udah bejalaika Pengawa Bepilih Nengeri (PRN) lalu semua kereban PRN agi ulih dikena ungkup PRU tu ila,” ku iya.

    Rohani ti mega nyadi (Kaban Kaunsil Tinggi) PBB Sayap Indu mega madahka ba rintai nama chalun ke engka bisi chalun bukai, tejuka JASA bejalaika tanggungpengawa sida.

    “Berita ngerimbas pending madahka bisi empat tauka lima iku nama udah dirintaika JASA tang awakka JASA ngaga pengawa nya, laban pemutus bepanggai ba Kepala Menteri Datuk Amar Abang Johari ti mega nyadi Presiden PBB, Chairman BN Sarawak enggau Menteri Besai Datuk Seri Najib Tun Razak ti mega nyadi Chairman BN Malaysia nentuka chalun nya ila,” ku iya seraya madah JASA diatu mayuh mantu ngatur licha ungkup mensia mayuh.

    Sebedau tu, Rohani kala nyadi MP Santubong kenyau ari Oktober 1990 ngagai April 2004.-UB

    Subjects:

  • No Comment to " PBB Pampang Batang Lupar seruran sedia napi PRU14 "