• ‘Ops Bersepadu’ ti dipejalai di Bintulu mujur nangkap 51 iku pesalah

    Published: Wednesday, 19 April 2017
    A- A+


    BINTULU: ‘Ops Bersepadu’ ngurangka jenayah, penyalah dadah enggau penyalah terapik sereta ke bukai begulai enggau mayuh bengkah ejensi ke digaga kena Hari Enam lalu tembu kena Hari Minggu tu tadi mujur nangkap 51 iku orang salah ari mayuh macham penyalah.

    Ketuai Polis Pelilih Bintulu, Superitenden Zailanni Amit madahka operasyen nya ngaul pengawa ngurangka penyalah dadah, jenayah enggau penyalah terapik tumu pagi Hari Enam lalu tembu pagi Hari Minggu ngaul pengawa meresa palan pemerindang.

    “Pengawa tu dipejalai berundingka sebana peranak menua nya,” ku iya madah rambau Pengawa Meri Basa ‘Ops Bersepadu’ begulai enggau mayuh bengkah ejensi ke bukai ba Balai Indu Opis Polis Pelilih Bintulu bedau lama.

    Ku iya, ba operasyen sekali tu, bisi empat palan pemerindang udah diperesa ba pasar lama ditu, ngempang jalai alun kena matau sida ke ngereja penyalah terapik ke disereta Polis Diraja Malaysia (PDRM) begulai enggau Kaunsil Pemansang Bintulu (BDA) sereta Komiti Nagang Pengawa Makai Suap Malaysia (SPRM).

    Ku iya, operasyen meresa, mansik enggau nangkap mega bela dipejalai ba Sungai Plan Kidurong ti disereta dua raban penerit adat berengkah ari pukul 10 malam nyentuk pukul 2 pagi lalu udah nya berengkah ari pukul 4 pagi nyentuk pukul 10 pagi ba sitak Sebauh.

    Ku iya nerang, semua operasyen tu mujur meresa 360 iku lalu 51iku udah ditan ketegal ditemu ngereja bemacham penyalah.

    Iya madahka operasyen tu mega disereta Opis Agama Islam Sarawak (JAIS) ti ngemeratka sida ke ngaga penyalah Syariah.

    “Ari operasyen tu seiku manang besereta keraban ba rumah endur bemalam di pasar lama Bintulu mega ditemu piak bekaul laban salah ba enakmen syariah,” ku iya seraya nampung, operasyen tu disereta 174 iku raban ari mayuh bengkah ejensi di Bintulu.

    Enggau pemujur operasyen nya, Zailanni meri terima kasih ngagai pengeran piak ke udah ngaul diri nyengkaum Opis Residen enggau Pelilih Bintulu, Opis Imigresen Malaysia, JAIS ke mega disereta raban ari Kuching, BDA, SPRM, Agensi Anti Dadah Kebangsaan (AADK), Persatuan Mencegah Dadah Malaysia (PEMADAM) sereta ke bukai.

    “Ejensi ke ngaul diri bejalaika pangku pengawa manah endar ba operasyen nyengkaum ari sukut nyediaka perengka pengangkut, orang gawa sereta operasyen ngemunaska nyerungkai rumah enggau ke bukai,” ku iya.

    Iya madahka operasyen ke bansa tu keterubah iya diatur piak sida lalu enda naka nya aja. Iya deka terus dipejalai jemah enggau bantu ari ejensi-ejensi ke bukai nentuka Bintulu menua ti lantang sereta likun endur diau.

    “Operasyen tu chukup ngemegahka ati asil ari pengeras semua seraya mujur nyapai tuju.”-UB

    Subjects:

  • No Comment to " ‘Ops Bersepadu’ ti dipejalai di Bintulu mujur nangkap 51 iku pesalah "