SPDP deka muka pampang di Semenanjung Malaysia


SEBAUH: Ubah ba nama Parti Demokratik Progresif Sarawak (SPDP) ngagai Parti Demokratik Progresif (PDP) ngambika parti nya ulih muka pampang di Semenanjung Malaysia kelebih agi di Johor enggau Selangor.

“Tuju pengawa nukar nama tu ketegal dikena nyediaka pelasar ngagai rayat Sarawak di Semenanjung Malaysia (Johor enggau Selangor) nyereta parti politik ti asal ari Sarawak tu,” ku Presiden SPDP, Dato’ Seri Tiong King Sing.

Kebuah pampang parti ditumbuh ba nengeri nya kelebih agi ba Johor ku iya, laban bisi lebih 50,000 peranak Sarawak enggau penyampau kaban manggai 10,000.

Nitih ku Kaban Parlimen (MP) Bintulu nya, piak sida bisi berandau enggau parti komponen Barisan Nasional (BN) di Kuala Lumpur bekaul enggau pekara nya alai nerima sukung ari piak bekaul kelimpah dipesetuju bala Komiti Tetinggi parti dalam sekeda aum sebedau tu.

“Madamka nama Sarawak ukai reti parti tu enda angkunka Sarawak, tang, pengangkun ngagai menua asal meruan bisi dalam ati,” ku iya rambau bejaku bejadi pampang SPDP Ulu Sebauh enggau Gerempung Rumah-Rumah Panjai Sungai Sebauh ba Rumah Saging anak Layang, Sungai Ensaie Ulu.

Pengawa nyilih nama SPDP ngagai PDP, ku iya, udah dikemendarka Opis Pengerejister Gerempung (ROS) dalam bulan Jun tu tadi.

Pia mega iya mejah sekeda kaban parti ari wilayah Utara ti madah diri enda nemu pasal pekara nya (ubah ba nama parti).

Berebak enggau nya, Tiong mega mejah ulah sekeda bala ketuai parti nya ti enggai nerima piak bukai kelebih agi kaban parti penyakal nyadi sebagi ari kaban SPDP ketegal kuota nyadi kaban udah chukup.

“Kitai sedia nukangka pintu ngagai sebarang piak ti bisi ati nyadi kaban parti enggau pinta sida beresi ari sebarang pengari ari parti ti kala disereta sida,” ku iya nyemetak seraya nampung, dalih kuota nyadi kaban udah chukup enda entu nyentuk lalu beratika ulah bala ketuai ke bansa nya laban sida nangi kaban baru nyulut agi kelebih agi ari pekara meri servis ngagai rayat.

Senario ke bansa tu, ku iya nampung silik agi, patut dibuai ngambika penyerakup enggau pengelikun ti diasai diatu seruran ulih dijaga sereta ditan.

Dulu agi ari nya, Pemangku Ketuai Bagi Menua SPDP N.69 Kemena, Ukar Kelayang madah piak sida deka terus chakah agi ngiga kaban baru dikena ngenegapka parti kelimpah nambah pemayuh tubuh kaban parti kelebih agi ba kandang menua Kemena.

Ku iya, mayuh agi pampang baru deka ditumbuh dikena nyapai juluk nya enggau pemerat ngagai sida ti bedau kala nyadi kaban sebarang parti komponen BN ke bukai.

Ungkup pengawa nya ku iya, iya naka ulih deka ngiga kaban ti bekaul seraya madah piak sida deka bejalai ngagai kandang menua ulu sungai baka Genaan, Kelabat enggau ke bukai kelimpah udah ngelala sekeda kandang menua endur pampang parti ditumbuh seraya madahka pengandal diri alai penyampau kaban deka terus nambah nyema program ngiga kaban baru nyapai tagit.

Pekara ti beguna endar ku iya, SPDP kelebih agi ba sitak (N.69) Kemena patut ngiga chara tauka mekanisme pemadu manah dalam meri servis ke menyana agi ngagai bala kaban parti kelebih agi kaban baru.

Ba lansa ke bukai, Ukar mega madah piak sida ngelaluka penatai ex-kaban parti penyakal (DAP enggau PKR) ke dalam SPDP enggau pinta ulah sereta runding sida enda ngaul pekara ari parti ke lama.-UB

No comments:

| | Copyright © 2014 SARAWAKIANA