RM8b dikena nyendia bekal elektrik serata S’wak


KUCHING: Sarawak begunaka belanja RM8 bilion dikena nentuka juluk 100 peratus kandang endur di serata nengeri nerima bekal elekterik manggai ba taun 2025.

Naka pengujung 2015, Menteri Perengka Guna Mensia Mayuh Dato Sri Dr. Stephen Rundi madah bekal elekterik ba menua pesisir ba ikas 86 peratus.

Ari peratus nya ku iya, 41 000 peranak menua pesisir bedau ngasai bekal elekterik.

“Nengah Langgur Pemansang Malaysia Lumpar Ke-11 (RMK11), Perintah Besai ngagihka belanja RM1, 355 juta ke alai ari penyampau nya RM850 juta ungkup ngerembai projek grid elekterik.

“Laluh RM505 juta dikena nyendia sistem alternatif iya nya program solar hybrid enggau Sistem Elektrik Alternatif Menua Pesisir Sarawak (SARES),” ku Dr. Rundi ba Aum DUN kemari.

Iya nambah, projek ngerembai grid lekterik deka mai pemaik ngagai 14,020 peranak menua pesisir.

Nengah program solar hybrid, Dr. Rundi madah lima projek ke beungkus RM434 juta benung digaga diatu ke alai tembu ila deka mai pemaik ngagai 2,469 ruang bilik.

“Nengah SARES, renggat keterubah projek ke beungkus RM71 juta berengkah ba bulan Mei 2016.

“Projek deka meri pemaik ngagai 58 genturung pendiau iya nya urung 1,439 ruang bilik.

“Penyampau 43 genturung pendiau ke kena bungkur projek SARES deka tembu ba bulan Januari 2017 lalu laluh 15 tembu ba bulan Mei 2017,”tandu iya.

Ngenang sentang Projek Tekat Ai Hidro Baleh, Dr. Rundi madah projek beungkus RM2 bilion nya deka nguntungka orang dagang/kompeni kelimpah nyendia 3,500 pengawa puang.

“Dikena nentu bala nembiak Baleh enggau Kapit bulih pemaik ari projek, belanja RM7.2 disedia dikena nyendia latih pengelandik enggau program insentif ngagai 500 iku nembiak,ku iya seraya madah sida deka diambi gawa ba HEP Baleh.

Iya nambah, RM100 juta udah diagih dikena ngaga tali penyambung 33kV ari Kapit ke Baleh.

Tembu ba 2020 ila, urung 126 genturung pendiau iya nya penyampau 2,567 ruang bilik nyengkaum 22 sekula bulih pemaik, tandu iya.-UB

No comments:

| | Copyright © 2014 SARAWAKIANA