Projek Sepital Sri Aman disadang tembu 2018


KUCHING: Menteri Kaunsil Kandang Menua Datuk Dr. Sim Kui Huan madah pengawa ngaga Sepital Sri Aman disadang tembu ba taun 2018.

Iya madah pejalai projek ke beungkus RM176.28 juta nya bisi laun ari perambu asal.

“Kereja ngaga Sepital Sri Aman ke nyendia 108 katil diatu manggai ba ikas 12 peratus iya nya kurang ari ikas 18 peratus ke diperambu,”ku iya rambau Aum DUN.

Kelimpah projek Sepital Sri Aman, iya mega madah projek ngaga Sepital Petra Jaya bela napi penanggul ke sama.

Ku iya, naka 31 Oktober 2016, pejalai projek Sepital Petra Jaya ba ikas 42.51 peratus enti dibanding enggau perambu ti patut manggai ba ikas 78.18 peratus.

“Ba sentang projek ngaga Sepital Lawas ke baru, kitai diatu benung nganti proses tinder ari Opis Kereja Raya,”ku iya.

Nitihka penerang Dr. Sim, spital baru Petra Jaya enggau Lawas ke beungkus RM495 juta enggau RM27.67 juta deka nyendia 300 katil sereta 76 katil.

Ngenang kaul ke sama, iya madah pengawa ngaga dewan buntas Spital Miri diatu manggai ba ikas 97.5 peratus.

“Nengah Atur Pemansang Malaysia Lumpar Ke-11 (RMK11), projek ke dikemendar mungkur pengawa ngemesai enggau ngemanah Blok Klinikal Sepital Miri enggau neonatal ICU Spital Limbang.

“Bela dibungkur dalam RMK11 iya nya kereja nyendia servis ‘lift’ ke baru ungkup Sepital Besai Sarawak (SGH) enggau Spital Sibu,’ku iya nandu.

Dr. Sim netap Opis Pengerai Sarawak keran ngangkatka servis di semua sepital serata nengeri.

Servis nya ku iya dibagi ngagai tiga bengkah menua iya nya zon utara (Spital Miri), zon tengah (Sepital Sibu) enggau zon selatan (SGH).-UB

No comments:

| | Copyright © 2014 SARAWAKIANA