26 iti seksyen Adat Iban 1993 deka diubah


KUCHING: Bisi 26 Seksyen dalam Adat Iban 1993 diperambu deka diubah, ngambika setipak enggau jalai pengidup diatu tauka dipadamka enti enda releven.

Menteri Muda ba Opis Kepala Menteri (Undang-Undang enggau Adat Bumiputera) Datuk John Sikie Tayai madah, perambu sereta peminta deka ngubah 26 seksyen nya kala udah dikenataika ngagai perintah dalam taun 2014.

“Bekaul enggau Adat Iban 1993, bisi 26 seksyen diperambu deka diubah.

“Perambu deka ngubah 26 seksyen Adat Iban 1993 kala dikenataika dalam taun 2014 iya nya dua taun ke udah, tang bedau diperundingka lalu agi kategori dokumen rasia, “ ku iya.

Sikie mansutka pekara nya lebuh nyaut tanya tambah ari Wilson Nyabong Ujang (BN-Pelagus) maya Sesi Tanya Saut dalam Aum Kedua Penggal Keterubah, Aum Kunsil Nengeri (DUN) ke-18 ke diatur ba Begunan DUN ditu, kemari.

Dulu ari nya, Sikie madahka bisi tujuh (7) Undang-Undang Adat udah dikodifikasyen ngambika dikena dalam Kort Bumiputera.

Majlis Adat Istiadat nengah bengkel enggau seminar ke diatur ungkup ketuai raban bansa, ketua bansa enggau pengemeran adat benung ngumpul timbal baka penemu enggau perambu ari pesereta pasal seksyen ke patut diubah nitihka jalai pengidup diatu tauka dipadamka aja nyema enda releven, ku iya.

“Pengudah tembu digumpul, perambu nya deka dikenataika ngagai perintah ngambika diubah.

“Ungkup Adat Iban ke udah dikenataika ngagai perintah, bisi 26 seksyen diperambu diubah,” ku iya.-BP

No comments:

| | Copyright © 2014 SARAWAKIANA