Sikap Pengereja Pengawa Ngena Pengelandik Ti Tinggi



KOTA SAMARAHAN: Kompeni sereta ejensi ba pengawa dagang mit sereta jelan pemesai (SME) diperansang nyikap orang gawa ngena pengelandik ke tinggi.

Menteri Penguasa Pemayuh Pengereja Pengawa Dato Sri Richard Riot Jaem madah, pekara nya berat ketegal SME ngembuan makit besai di menua Asia lalu patut dikerebut.

“Asia nyadi menua ba penuduk lumur tiga pemadu besai lalu ngembuan 630 juta iku mensia.

“Ditu mih makit besai patut dikerebut orang dagang SME,’ku iya ba pengerami Graduasi SME@Unimas ke diatur di PITAS Unimas kemari.

Riot nambah, di Sarawak sepenyampau 44,000 buah kompeni bisi ngaul diri ba SME lalu nya ngarika 7 peratus ari semua 645,000 SME di Malaysia.

Ku iya, SME nyadi sebengkah pengawa berat dalam atur nentuka Malaysia nyapai menua mansang bepemisi tinggi manggai ba taun 2020.

“SME entara sebengkah pengawa ekonomi menua lalu ngasilka 36 peratus ari penyampau asil GDP. SME mega ngasilka 18 peratus ari semua penyampau ekspot ba taun 2015,”ku Riot.

Ngenang kaul ke sama, Riot ke mega MP Serian netap, ngembuan orang gawa ke bepengelandik deka nyaup ngangkatka SME seraya nyaup ngangkat Malaysia nyadi menua mansang.

Irauka ikas orang gawa bepengelandik ke mengkang baruh ari ikas 50 peratus, Riot ngarap ulih nyapai ikas 35 peratus dalam timpuh Atur Pemansang Malaysia Lumpar Ke-11 (RMK11).

“Aku udah suah bejalai ngagai menua Eropah sereta Asia lalu ari peratika aku, ikas orang gawa bepengelandik di Malaysia mengkang baruh lalu tau ngemuntan juluk kitai ti deka nyapai menua mansang bepemisi tinggi.

“Ikas kitai diatu iya nya 28 peratus lalu balat jauh enti dibandingka enggau Singapura ba ikas 52 peratus, Jepun/Korea (60 peratus) enggau Jerman (80 peratus),”ku iya.

Dikena nentuka kitai enda jauh tinggal, pelajar ba pekara teknikal deka dikemerat, tandu iya.

Seraban 16 iku ti nyereta program SME@Unimas dalam timpuh 3 bulan nerima setipikit ari Riot kemari.

Bela datai Mandal Canselor Unimas Profesor Dato Dr Mohamad Kadim Suaidi, Sapit Mandal Canselor (Pekara Pelajar enggau Alumni) Prof Mohd Fadzil Abdul Rahman, Sapit Mandal Canselor (Pansik enggau Inovasyen) Prof Dr Kopli Bujang enggau CEO Pemansang Modal Mensia Berhad CM Vignaesvaran A/L Jeyandran.-UB

No comments:

| | Copyright © 2014 SARAWAKIANA