Sarawak Patut Berundingka Perambu Peminta Numbuh Opis Menteri Pemansang Bansa Dayak



KUCHING: Parti Bansa Dayak Sarawak Baru (PBDSB) ngenatai perambu ngagai Perintah Sarawak ngambi ulih numbuhka opis menteri ke ngintu pemansang komuniti Dayak.

“Perambu numbuhka Opis Menteri Pemansang Bansa Dayak (MDD) ngambi ulih nyendia polisi ungkup bansa Dayak, nyadi pengembing sereta konsultasyen sentang kaul perintah begulai enggau bansa Dayak.

“Opis menteri nya mega dikearap ulih merambu polisi mungkur semua pekara ke bisi kaul enggau bansa Dayak, ari tusun perintah, undang-undang sereta pekara ke bekaul enggau tanah,”ku Presiden PBDSB Cobbold John.

Cubbold nambah, opis menteri nya ukai ejensi baru di Semenanjung Malaysia ke alai ngelama ke udah sigi bisi opis menteri ke ngintu pemaik bansa Orang Asal ke dikumbai Jabatan Kemajuan Orang Asli (JAKOA).

Ku iya, ejensi perintah nya (JAKOA) ngembuan geran ungkup pengawa dagang ke diagih ngagai orang dagang mit enggau jelan pemesai (SME) bansa asal di Semenanjung Malaysia.

“Udah kelalu lama, Sarawak mengkang enda berunding numbuhka seiti opis menteri tauka ijinsi ti ngintu pemansang bansa Dayak. Tu seiti chara dikena ngadu ubah ba kandang menua pesisir.

“Di New Zealand, bisi Opis Menteri Pemansang Bansa Maori ke ditumbuh Perintah New Zealand ungkup pemaik polisi ubah bansa asal menua nya,’ku iya nambah.

Ngenang kaul ke sama, Cobbold pechaya tu mih maya perintah patut ngemata pekara tu enggau berat agi kelebih agi diatu bansa Dayak udah bisi dua iku Sapit Kepala Menteri, Tan Sri Datuk Amar James Jemut Masing enggau Datuk Amar Douglas Uggah Embas.

Nengah ijinsi tu, Dayak ulih ngangkatka diri ba pengawa dagang, ekonomi, pengelandik ba mayuh bengkah industri baka ke agro-kultur, aqua-kultur, minyak enggau gis, SME enggau mayuh agi pengawa bukai, tandu Cobbold.

Cobbold nambah, PBDSB seruran meratka pemaik bansa Dayak lalu ukai semina ba pekara politik.

Nengah pelin ke manah, Cubbold mega pechaya main asal enggau pesaka lama bansa Dayak ulih diintu enggau manah ke alai Dayak mega ulih nyaup ngangkatka industri dagang temuai di menua tu.

“Semua tu ukai semina ungkup pemaik bansa Dayak aja, tang mega mai penguntung ngagai Perintah Sarawak.

“Mayuh NGO Dayak udah ditumbuh ngelama ke udah enggau tuju ngintu pemaik enggau pemansang komuniti diri.

“Enti opis menteri ke diperambu ulih ditumbuh, semua NGO deka diperabung seiti ijinsi lalu ulih nyeliah sengki penemu entara sama diri.

“Semua deka begempung dibaruh seiti opis menteri ungkup pemaik nengeri Sarawak enggau rayat,”ku iya.-UB

No comments:

| | Copyright © 2014 SARAWAKIANA