Presiden REFORM Enda Tekenyit Enggau Pemutus Digaga Ketuai PKR, DAP Sabah



KUCHING: Presiden Parti Reformasi Sarawak (REFORM), Lina Soo enda tekenyit enggau pemutus sekeda ketuai renggat tinggi PKR enggau DAP Sabah ti ningkilka diri ari parti sida kemari.

Lina madah diri nemu pekara nya kenyau ari pun lalu semina nganti maya ke ngena endur sida ningkilka diri lalu pekara nya udah nyadi kemari.

“Pemereti sentang prinsip otonomi, ngenggaika champur orang ari luar nyadika kebuah sida ngambi pemutus nya.

“Tajapan gaya tu baru di Sabah, aku ngarap orang politik di Sarawak bela meretika pekara tu lalu hak Sarawak semina ulih diintu parti ari Sarawak,”ku iya.

Lina nambah, REFORM ngelaluka kaban parti ari Malaya (Semenanjung Malaysia) ti deka nyereta tauka ngambi bagi ba agenda politik REFORM.

Tuju REFORM ku iya sigi deka nitihka Sempekat Malaysia sereta mulaika hak Sarawak ke nyadi kaling kunsi enggau Malaya dalam federasyen.

“Piak Malaya ngembuan agenda sida empu lalu semina Sarawak ti amat bebendar negika pemaik Sarawak enggau nadai champur ari parti politik ari luar,”ku iya.

Ngenang sentang pekara nya, gempung penyakal dipeda majak lemi di Sabah pengudah pemutus ke diambi raban ketuai nya.

Entara ke ningkilka diri ari parti iya nya Chairman PKR Sabah, Datuk Seri Lajim Ukin ke mega ADUN Klias, Sekretari Besai PKR Sabah, Datuk Maijol Mahap, Ketuai Orang Indu PKR Sabah, Johair Matlani enggau ADUN PKR Moyog, Terence Siambun.

Bela nitihka singkang sida, Sapit Chairman DAP Sabah, Joan Hoh sereta Mandal Chairman Sabah, George Hiew enggau Adun DAP Likas, Junz Wong.-UB

No comments:

| | Copyright © 2014 SARAWAKIANA