Perintah Mantu Nembiak Dayak Nengah EFR SDGA



KUCHING: Perintah Nengeri udah nyuaka geran nengah Wang Turu Bantu Pelajar (EFR) 2016 Gerempung Graduet Dayak Sarawak (SDGA) dikena mantu nembiak Dayak ke nampung pelajar ba universiti perintah (IPTA) di menua tu.

Sapit Kepala Menteri, Tan Sri Datuk Amar Dr James Jemut Masing madah, nembiak ke nerima bantu ari perintah nengah SDGA nya patut temegah ati sereta ulih mantu perintah ngemansangka menua jemah ila pengudah sida graduet.

Iya madah, bantu nya semina sekali meri aja dikena ngelempung tating belanja lebuh baru nampung pelajar ba universiti perintah di menua tu.

“Sehari tu Perintah Nengeri nyuaka geran ngagai ERF SDGA dikena mantu nembiak Dayak ke nampung pelajar ngagai universiti perintah di menua tu.

“Nya alai aku ngarapka nembiak tu ulih belajar enggau bebendar lalu jemah ila mantu ngemansangka nengeri tu laban nengeri tu ungkup kita, ukai semina ungkup perintah.

“Nengah geran tu perintah nengeri mantu nembiak ke patut sereta amat begunaka bantu, sehari tu kitai amat gagit amat laban tebal agi penerima bantu tu nembiak indu, iya nya 20 iku lalu lelaki semina tujuh iku. Tu ngayanka orang indu di Sarawak amat bepelajar,” ku iya lebuh dikerandau raban pengarang berita, kemari.

Dulu ari nya Masing ba opis iya di Begunan Baitulmakmur nyuaka geran EFR 2016 SDGA ngagai 27 nembiak ke baru nampung pelajar ba Universiti Malaysia Sarawak (UNIMAS) enggau Universiti Teknologi Mara (UiTM) Sarawak.

“(Bekaul enggau bantu tu jemah ila) Kitai deka matau pemansang SDGA, sekalika ulih mantu kitai ngemansangka nengeri, nya pemadu beguna,” ku iya ti mega Menteri Pemansang Infrastruktur enggau Perengka Pengangkut.

Nitihku Tukang Wang Besai SDGA ti mega Ketuai EFR 2016,Tamoi Janggu madahka penumbuh EFR nya senipak enggau objektif gerempung ti beratka pelajar awakka ulih ngangkat ekonomi bansa Dayak sereta ulih besemekih enggau bansa bukai.

ERF ku iya, disediaka ungkup nembiak ke benung ngambi degree keterubah ba semua universiti perintah, berengkah ari bulan September 2016 tu tadi.

“SDGA bisi nerima 160 peminta ERF 2016 kenyau peminta nya dibuka berengkah ari 18 nyentuk 27 Ogos tu tadi, tang SDGA semina ngemendarka 91 iti peminta aja.

“Kriteria ke dikemeratka panel lebuh nentuka sapa bagi nembiak ti patut nerima bantu tu iya nya, nembiak ke datai ari ruang bilik ti kurang penatai pemisi (bepelasarka penatai pemisi perkapita ruang bilik) enggau semina ungkup nembiak ke ulih nampung pelajar ba universiti perintah aja.

“Kami (SDGA) amat beterima kasih sereta temegah ati ngagai YAB Kepala Menteri laban ti meri geran ngagai ERF 2016,” ku iya.

Nembiak ke nampung pelajar barenggat degree nerima bantu sekali meri RM1,000 lalu renggat Diploma RM800.

Berebak enggau tu SDGA mega ngarapka pengari rayat, orang dagang, kompeni tauka pengaji sereta orang seseiku gerah jari meri bantu ngagai Wang Turu Pelajar SDGA ngambika mayuh nembiak ulih dibantu jemah ila.

Sama bisi ba atur pengawa nyuaka geran nya kemari, Sapit Presiden Noelle Lily Morse enggau ke bukai.-UB

No comments:

| | Copyright © 2014 SARAWAKIANA