Pemimit Akauntan Bumiputera Enda Tau Enda Diputar



KUCHING: Pemimit pengereja pengawa akauntan ari raban komuniti Bumiputera, seiti penanggul ti enda tau enda diputar, ku Ex-ADUN Tasik Biru Datuk Peter Nansian Peter Ngusie.

Iya madah statistik ke pengabis baru ari Institut Akauntan Malaysia (MIA) mantaika, naka bulan Januari 2016, semina 18 ari 571 (3.1 peratus) raban nya di Sarawak, ari komuniti Bumiputera.

“Penyampau ba pengelandik bukai baka kus ACCA, CIMA tauka CPA pelaba aku mimit agi.

“Taja pia, ba pengelandik ari menua tu empu ti dikelala di Malaysia, 68% komuniti Bumiputera. Tu mandangka komuniti Bumiputera bisi pengerindu ba pengawa akauntan.

“Pemar ke ditapi diatu iya nya ngumbuk bala nembiak Bumiputera milih pengelandik profesional baka ACCA,” ku Peter.

Iya madah munyi nya lebuh bejadika Pengerami Konvokesyen Kolej Sunway Ke-21 ke diatur ba sebengkah hotel ditu, kemari.

Kolej Sunway ngembuan kerejasama enggau Yayasan Sarawak sereta Yayasan Peneraju Bumiputera (TERAJU), ngemansangka mayuh agi nembiak Bumiputera ngambi kus CAT sereta ACCA.

“Aku berasai temegah ati ninga program tu bejalai enggau mujur, lalu aku mega berasai temegah ati ninga Yayasan Sarawak bisi melanja nembiak CAT antara kita ke graduet sehari tu,” ku iya.

Dalam pengawa kitai nyapai Malaysia nyadi sebuah menua industri, menua tu begunaka pengereja pengawa ke bepengelandik, akauntan ke professional, ku iya.

“Pengawa nyadi akauntan kemaya hari tu dipeda sebagi ari pemerat ke tiap buah palan endur gawa.

“Pengawa akauntan ukai semina nyimpan bup lejer aja, tang sida iya nyaga pengawa meresa sereta nimbang dikena beratika pemerat wang kompeni nya.

“Aku ngelalau mensia mayuh, anang kelalu arapka jaku selebubu ke madahka pengawa nyadi akauntan tu pengawa ke enda dikerinduka mensia mayuh. Aku mega seiku akauntan, aku tau madah ngagai kitai pengawa nyaga akaun tu pengawa ke umbas iya, bisi pemar sereta meri penguntung ngagai kita,” ku iya.

Peter ti mega nyadi Chairman Borneo Development Corporation (BDC) madah dalam kandang dua abad tu ke udah, pengawa nyadi akauntan sereta pengawa ke bisi bekait enggau wang, udah jauh berubah, nimbal ngagai trend ke majak mayuh, nyerumba revolusyen komputer, atur perintah ke majak nambah, ubah ba undang-undang chukai, pengawa dagang ke nyadi global sereta kompeni ke majak kurang ngambi orang gawa tauka tusun baru kompeni.

“Dalam gaya pengawa ke besemekih sereta kompleks, pengawa nyadi akauntan sereta pengelandik ba sentang wang beguna endar.

“Lalu berindik ari nya, pengawa akauntan ukai agi pengawa tradisional, tang mayuh ngaga pengawa sida iya baka pakar, ke ngena sistem ke profesional, tau nyadi konsultan, ngaga analisis bajet sereta pengawa bukai ke bisi bekait enggau lumur,” ku iya.

Sebedau nya, Ketuai Pegawai Eksekutif (CEO) Kolej Sunway, Joseph Lim madah taun tu ngelai ke-12 taun Kolej Sunway udah bisi di Kuching, alai keterubah iya suba, Kolej Sunway ngambi penuduk Cadas Business School (CBS) dalam taun 2007.

Berindik ari nya, Kolej Sunway udah nyapai pemujur, enggau beribu iku nembiak ke udah graduet sereta nyadi akauntan profesional di menua tu nyengkaum di menua luar.

“Kus ACCA sereta program CAT kami nyadi penegap kolej tu. Kami dikelala nyadi sebuah palan pelajar ke nyendiaka dua iti kus tu di Malaysia Timur. Dalam peresa bulan Jun 2016, kami mujur ngetanka penuduk peresa ACCA Platinum Approved Learning Partner ke-13.

“Platinum nyadi tikas ke pemadu tinggi sereta besai reti ke bulih diaku ACCA ngagai sida ke nyendiaka kus tu, lebih agi ngagai kolej tauka universiti ke nyapai indikator ke terit ba tikas dunya,” ku iya.-Sarawakiana

No comments:

| | Copyright © 2014 SARAWAKIANA