Pemansang Ba Pesisir Deka Disebaka Di Mengeri



BETONG : Perintah Barisan Nasional (BN) naka ulih mai ubah pemansang ngagai menua pesisir ngambika sebela enggau pemansang di mengeri.

Diatu, berupai amat dipeda bisi takah pemansang di mengeri enggau menua pesisir, nya alai juluk perintah deka ngedutka takah tu.

Kaban Kunsil Nengeri (ADUN) Engkilili Dr Johnical Rayong Ngipa madah ari baruh perintah dipegai Kepala Menteri Datuk Patinggi Tan Sri Adenan Satem alai peranak menua pesisir ti talukka BN ngelama tu endang patut dibalas.

“Kitai ngasaika udah datai maya iya perintah lebih ngemeratka pemansang ungkup peranak menua pesisir sereta enda ninggalka pemansang di mengeri,” ku iya.

Iya mansutka jaku tu rambau bejaku ba pengawa bejadika Bekal Elekterik Menua Pesisir ba Rumah Banta, Kubal Batu, Lidong, Betong ditu ensanus.

Ku iya, kenyau ari mangku pengawa, Adenan udah ngasuh semua pengari rayat beratika peminta pemansang ba menua pesisir nyadika pemerat sida.

“Nya alai, udah nyadi tanggpengawa pengari rayat ke dipilih nangkup peminta rayat ke milih sida nyadi penyambung antara perintah enggau rayat sereta beratika peminta sereta ngansak mutarka pekara enggau jampat nitihka penau belanja perintah,” ku iya.

“Tambah mega rayat nyata endar mantai peneka sida rambau pengawa bepilih tu tadi enggau meri mandat ke besai.

“Nya kebuah perintah nadai pilih ke bukai tang gawa bebendar ngemai pemansang ngagai kandang menua sida empu sereta bagas bejalai ngagai renggat pun menua.

“Ba kandang menua Lidong nyengkaum Kubal tu, aku berasai lantang endar laban udah mayuh pemansang, ari kandang menua ke mar dilawa diatu udah bisi jalai alun belakin, ari ke petang diatu udah bisi bekal elekterik 24 jam,” ku iya.

Pia mega, iya dekaka rayat ngena awak dalam pengawa betanam betupi lalu ari pengawa betanam tu nyadi dagang sida dikena mansutka asil penatai pemisi menyana agi.

“Diatu pengawa betanam betupi agi dikumbai kelas kedua lalu semina dikereja sida ke tuai aja. Tu salah endar laban nyema dikereja ngena chara komersial tau ngemansutka penatai pemisi ke lebih manah.

“Tadi pengari ari Opis Betanam Betupi, James udah madah bisi empat awak patut dikena tang naka ke diatu apin nerima timbal ke manah, taja ulih ngemansutka penatai pemisi,” ku iya nerang nyemetak.

Ngelansa pekara ke bukai, tanah Adat Bansa Asal (NCR) patut disukat kelingi dikena nentuka sapa bagi ke ngempu sereta ke patut diberi surat pala tanah.

“Tanah puang tu patut dikemansang enggau utai tanam komersial baka lada, sawit, getah tauka nupi manuk, serati enggau ikan,” ku iya seraya nambah tu ulih nempa tanah ke mungkur pemesai beratus ekar ulih ngemansutka asil.

“Reti iya, perintah nadai niat deka ngambi tanah NCR rayat baka ke dipadah sekeda piak tang tanah tu diberi surat pala tanah sereta dikemansang enggau tuju perintah ngembuan penatai pemisi RM4,000 sebulan manggai ba taun 2030,” ku iya.

Beserimbai enggau pengawa nya, Dr Rayong bisi ngemendarka geran Projek Mit Pemansang Menua Pesisir (MRP) ngagai Komiti Pemansang Enggau Pengelikun Genturung Pendiau (JKKK) penyampau RM10,000 lalu Biro Indu nerima RM3,000 nyadika belanja dikena ngatur aktiviti ninting taun sida.

Sama bisi datai Kaban Parlimen (MP) Lubok Antu Datuk William Nyalau Badak, Pemesai Opis Betanam Betupi James Nyigom, bala penghulu, kaunsilor enggau tuai rumah besemak kandang menua Lidong enggau Skrang Ili kelimpah ari Skrang.-UB

No comments:

| | Copyright © 2014 SARAWAKIANA