Nembiak Menua Pesisir Patut Landik Ba Jaku Inggeris



MARUDI: Menteri Muda Kunsil Kandang Menua Datu Dr Penguang ngelalau bala nembiak sekula primari ba kandang menua pesisir belajar sereta landik ba Jaku Inggeris ngambika sida ulih nyingkang jauh agi jemah ila.

Ku iya, Jaku Inggeris ke mega jaku ti dikena ba tikas antarabansa endang dikemerat nyadi penyambung ba dunya pemansang ti maajak mar diatu lalu penyulut sida ulih nemu bahasa Inggeris mega deka nyamin sida nyingkang jauh ba dunya jemah ila.

“Anang kita enda belajar Bahasa Inggeris enggau jaku bukai ke nyadi batang jaku ba tikas antarabansa, laban tu dikemeratka di dunya pemansang ke makin enchabar diatu.

“Taja pia, anang sesekali kita ngelengkaka jaku bansa diri empu enggau jaku Bahasa Melayu sereta main asal enggau penatai asal kitai,” ku iya nambah.

Penguang ke mega Kaban Kunsil Nengeri (ADUN) Marudi madah munyi nya lebuh bejadika Pekit Lumba Majlis Sukan Sekolah-Sekolah Rendah (MSSR) Tikas Zon Tinjar ba Sekula Primari (SK) Sungai Bong di Tinjar, bedau lama ti udah.

Bekaul pekit lumba ke diatur iya madah, lumba enggau main iya nya seiti pekara ti dikemeratka kelimpah ari akademik, laban tu ulih nyamin pengerai tubuh enggau runding nembiak sekula pia mega ulih nyadika eksesais ungkup sida.

“Nyema kita rindu dalam lumba lalu bisi potensial, belatih bebendar nyentuk ke tikas ti tinggi agi, andalka apai indai, sekula enggau ari ni penatai kita,” ku iya.

“Ayanka pengulih kita dalam lumba pia mega nyadi nembiak sekula. Anang betegalka sekula menua pesisir ke endang kurang pemisi ari sukut infrastruktur nyadika penanggul kita majak mansang ba lumba enggau pelajar.

“Tang jadika semua tu seiti penguji dikena kitai mansang ke mua lalu seriris enggau nembiak ari sekula di mengeri,” ku iya nambah.

Penguang madah, enti nembiak sekula sedia mandangka pengandal enggau pemendar sida lalu ngaga pengabis manah, iya deka bebendar nyaup sida semua.

Berindik ari tu iya minta apai indai ngambi awak tu bekunsi peneleba, penemu sereta ke bukai ti beguna dikena ngemansangka anak sida.

Ba program nya, Penguang mega ngungkupka geran Pemansang Menua Pesisir (MRP) RM10,000 ngagai Gerempung Apai Indai enggau Pengajar (PIBG) SK Sungai Bong enggau tepa,iya nya bup pelajar enggau motivasyen nyadika referen sekula nya.

Sama bisi datai Chairman Opis Pelilih Marudi (MDM) Edward Mendai, Kepala Pengajar sekula Edward Nuli sereta pengari Opis Pelajar Baram, Matthew Ding.-Sarawakiana

No comments:

| | Copyright © 2014 SARAWAKIANA