Menua Borneo Enda Pungkang Raban Pakar Ke Ulih Nempa Sejarah Perubat



KUCHING: Anang ngumbai menua Borneo pungkang pakar ke bepengelandik nempa sejarah dalam bidang perubat nyengkaum pemujur beputung, laban bala lutur pakar datai ari Sarawak mega ulih bekunsika penemu, teknologi ditu ngagai renggat dunya, ku Menteri Opis Kandang Menua Datuk Dr. Sim Kui Hian.

“Aku deka meda menua Borneo ditu, ulih bekunsika penemu, bekunsika teknologi ngagai renggat dunya…Nadai kebuah kitai enda ulih.

“Kitai anang semina berasai gaga ketegal teknologi datai ngagai kitai, kitai patut nyebut, kitai bisi pengelandik pikir, kitai teulihka sukung, aram ngulihka teknologi.

“Aram kitai bekunsika teknologi enggau serata dunya, nya ke patut nyadi pemungkal, enggai ke kitai alah laban orang bukai, semadi meh kitai ngumbai kitai tu ke pengabis baruh endar.

“Taja pan dalam kampung di Borneo, kitai bisi teknologi ke pemadu manah, ukai semina bejaku aja,” ku Dr. Sim.

Iya madah munyi nya lebuh bejaku bejadika Sarawak Hear and Rehabilitation (HEAR) di China House, ba Kot Lama ditu, kelimpah ari meri puji ngagai tim Sepital Besai Sarawak ke udah mujur ngaga dua kes ‘Auditory Brainstem Implant’ (ABI), ke pemungkal iya di Malaysia, kemari.

Kelimpah ari teknologi, komponen berat bukai ku iya, seraban orang ke nyukung pangan diri.

“Orang ke bisi penyelai, diri sebilik ke sayauka anak sida ke udah nyendiaka awak ke puh ngajar anak sida iya ke betapi enggau penanggul bengal.

“Aku meri puji ngagai semua sida tu, taja pan kita betapi enggau mayuh penanggul laban kita udah meri ke pengabis manah ngagai diri sebilik ke betapi enggau bengal,” ku iya.

Ba sebengkah rehabilitasi, Sarawak ku iya, ulih ngaga sejarah kediri empu ba pemungkal sida iya ngena teknologi mantu kes orang bengal.

“Kita nya mujur agi ari sida ke diau di menua luar laban kitai rindu sereta siru ke pengawa kita, sereta arapka utai ke digaga kita, lalu kita pan ngereja pengawa kita ukai ketegal gaji, tu ke nyelai ba kita ke bisi pengerinduka pengawa kita,” ku iya.

Iya nandu bar, raban lutur orang sempama baka ‘orang dagang ke enda mujur’ tang sida iya mujur chara professional, tu ke nyelai, lalu ukai semina mujur dalam pekara tu, tang bisi pemerat nyingkang ngagai tikas nangkan nya,” ku iya.

Dr. Sim mega madahka iya meri jaku puji ngagai Sarawak HEAR ke udah mai semua orang begempung berengkah ari sida kemegai polisi ngagai NGO, enggau diri sebilik.

“Aku madah ke kebuah iya…Iya nya lebuh umur kitai manggai ba tikas ke tuai, mayuh ari kitai betapi enggau penanggul enda ulih ninga enggau terang. Tau peda kita orang ke tuai-tuai, tauka anak mit ke baru ada lalu betapi enggau penanggul enda ulih ninga.

“Aku meri jaku puji ngagai tim HUS laban udah mujur ngemutarka dua iti kes ‘Brensteming Plant’ di Malaysia, taja pia, singkang tu mit, tang japai nya ngubah gaya servis kita.

“Ke pengabis berat ngaga servis, iya nya di HUS, orang ke dikaul, tang enda tau enda bisi uji ba orang, wang turu sereta infrastruktur. Wang turu nyadi pengimbang. Orang nyadi pekara ke pengabis berat, sereta ngaga mayuh servis,” ku iya.

Sebedau nya, Prof Madya ti mega nyadi Konsultan ENT Surgeon, Dr Tang Ing Ping madah Sarawak HEAR nyerakup orang ke ngatika diri, raban ke mit, sereta industri bela mantu mantu anak mit sereta orang besai ke betapi enggau penanggul bengal.

“Tang seharitu, nyadi hari ke berat, ke ngelaika sejarah baru. Sarawak HEAR mai semua orang ke ngatika diri, raban ke mit, industri sereta orang ke ngaga polisi bela besaup nyapai juluk ke sebaka, iya nya meransang sida ke betapi enggau penanggul bengal ngagai dunya ke ulih ninga,” ku iya.

“Visi gerempung kami, iya nya meransang sida ke betapi enggau penanggul bengal , gerempung kami nyendiaka palan kena nyendiaka pemadah baru sereta bantu ba chara ngubat bengal,” ku Dr Tang.

Iya nandu, sida ke bisi ruang bilik, Sarawak HEAR nyendiaka palan alai latih, pelajar sereta sukung ngagai orang ke dikesayauka sida.

“Ngagai mensia mayuh ke bukai, sereta sida ke bisi ati deka mantu, gerempung tu nyendiaka palan meri penemu awak ngagai semua bansa sama nyukung sida ke begunaka bantu tu.

“Sida ke ngaga polisi, gerempung tu nyendiaka palan alai minta penemu enggau pengatur pemisi ungkup sida ke nyaga orang ke betapi enggau penanggul bansa tu,” ku iya.

Sarawak HEAR, sebuah gerempung baru ditumbuhka betuju nyukug sida ke betapi enggau penanggul bengal, sereta sida sebilik ke ngena chara sida empu nyadi chara bejaku.

Gerempung tu sedia bekerejasma enggau sekeda opis nyengkaum opis Perintah, NGO ngambika ulih meri penemu bekait enggau penanggul bengal sereta baka ni deka meri ‘aural rehabilitation’, kelimpah ari mantu sida ke bengal ngambika ulih ninga baru lalu ulih bejaku baka orang bukai.

Enti sapa-sapa ke deka nyadi raban gerempung tu, iya dibukai ngagai semua ke betapi enggau penanggl enda ulih ninga, sida sebilik sereta profesional ke ngembuan kaul ke terit bekerejasama enggau sida ke betapi enggau bengal.

Tengan taun tu tadi, Sarawak HEAR nempa sejarah baru lebuh sida iya mujur ngemutarka dua iti kes, Auditory Brainstem Implant (ABI) di Malaysia, ke dibantu ulih tiga iku orang ke nyadi spunsa, iya nya Sapit Kepala Menteri Datuk Amar Douglas Uggah Embas (RM35,000), Direktor KTS Holdings Sdn Bhd Datuk Henry Lau (RM35,000), Direktor Asia Pasifik MEDEL Thomas Muller (RM70,000) sereta sekeda kompei bukai ke nyendiaka perengka guna mantu sida ke betapi enggau bengal enggau meri perengka guna ke ulih dikena sida iya ninga baru.

Dua iku penerima ABI bela betapi enggau penanggul ‘Neurofibromatosis Type II, iya nya pemansang ari ‘Benign Tumor’ dalam kandang ‘auditory-vestibular nerve’ (Hearing and balance nerve).

Beduduk ari nya, dua iku nembiak nya napi penangul ninga dalam 10 taun, sereta nadai bantu diberi ngagai sida iya nyengkaum bantu perengka guna ke ulih dikena mantu sida pulai gerai baka orang bukai.

“Pengudah diputung ngena ABI nya ngubah chara pendiau anak mit tu. Diatu kededua anak mit nya benung bejalaika rehabilitasi bejaku (aural) ngambika ulih ngemanahka agi pengelandik sida iya ninga sereta strategi belajar chara bejaku,” ku Dr Tang.

Sama bisi datai, presiden Gerempung Berubat Malaysia (MMA) Prof Dr Sen Gupta, ke nyadi presiden ari Sarawak eterubah iya, nyengkaum pemujur iya ke udah ngelatih mayuh pakar beputung di Sarawak sereta serata Malaysia, Dekan Fakulti Berubat UIMAS, Prof Dr Ahmad Hatta, Dr John Chew, chairman MMA Sarawak Dr. Singh Khaira, enggau Datin Wendy Lau ngarika Datuk Henry Lau (Menijer Besai KTS Group).-UB

No comments:

| | Copyright © 2014 SARAWAKIANA