Bala Nembiak Dilalau Anang Lembau Besekula



SRI AMAN: Perintah deka terus ngemeratka pekara pelajar di nengeri tu dikena ngadaka mayuh agi orang gawa profesional.

Menteri Muda Ekonomi Menua Pesisir (Kandang Menua Ulu) enggau Kebun Bedandang Besai Datuk Francis Harden Hollis madahka, nengeri tu endang begunaka orang ti gawa profesional dalam nyempulang perintah ngemansangka nengeri tu.

Berindik ari nya ku iya, perintah deka bala anak kitai diatu ngulihka penemu sepemayuh ke ulih dikena nyapai juluk nya.

Harden ke mega Kaban Kunsil Nengeri (ADUN) Simanggang madah munyi nya lebuh bejaku bejadika Pengerami Nyambut Hari Confucius enggau Nyuaka Insentif Duit Turu Pelajar Dipelanja Ngu Siong Wu, Pertubuhan Meninggikan Akhlak Che Chuan Khor ke digaga di Hotel Seri Simanggang ditu bedau lama udah.

Harden madah, bala nembiak sekula patut muai perangai kelalah nurun sekula laban perangai baka nya ulih ngenusahka pengidup dudi hari nembiak nya empu.

Berindik ari nya, apai indai patut megai tanggung pengawa ke besai dalam nentuka bala anak sida seruran nurun ke sekula lalu ngulihka penemu ti chukup.

“Ba sekula pengajar deka nyaga lalu ngajar sida, tang lebuh ti pulai ke rumah apai indai meseti megai tanggung pengaawa nyadi pengajar sida sereta seruran nentuka bala anak enda tepawah ari pelajar sida.

“Pesan aku nuju bala nembiak, anang sesekali muai awak ke bisi maya tu, tu mih maya iya kita ngulih penemu sepemayuh ke ulih laban tu nyadika jematan pengidup kita lebuh jemah ila,” ku iya nandu.

Sama bela bisi ngulu pengerami nya, Pemancha Lee Siang Hua, Chairman Pertubuhan Meninggikan Akhlak Che Chuan Khor Simanggang, Kapitan Kuek Aik Seng sereta ke bukai.

Lebuh pengerami nya, Harden mega bisi ngagihka geran perintah penyampau RM12,000 ungkup Jomiti Kurikulum, Sekula Primari China (SJK) Chung Hua Simanggang ke dikena bejalaika aktiviti sepemanjai taun sekula nya.

Beserimbai enggau nya, Harden mega nyuaka insentif pelajar ngagai nembiak PT3, Sijil Pelajaran Malaysia (SPM) sereta Anugerah Perkhidmatan Cemerlang (APC) enggau Anugerah Khas Guru SJK Chung Hua Simanggang.-UB

No comments:

| | Copyright © 2014 SARAWAKIANA