Aram Mih Besaup Ngemansangka Pelilih Bau



BAU: Peranak ke diau ngelingi pelilih Bau dipinta begulai enggau perintah ba atur ngemansangka pengelebih ba sitak nya, Ku Sapit Kepala Menteri Tan Sri Datuk Amar James Jemut Masing.

Bejaku bejadi pengawa nutup Festival Tasik Biru di Bau kemari, iya madah mayuh palan pematak temuai ngelingi Bau mengkang enda dikelaku enggau ransing.

“Ikon Pelilih Bau sigi Tasik Biru tang kelimpah ari nya ditu mega bisi Gua Angin, Gua Fairy, pasar Serikin, sungai endur aktiviti berakit sereta ke bukai.

“Dikena nentu semua palan tu dikelaku, semua kitai patut segulai sepenemu enggau perintah,’ku iya.

Masing ke mega Menteri Pemansang Infrastruktur enggau Pengangkut meri puji ngagai ADUN Tasik Biru Dato Henry Jinep enggau ADUN Serembu Miro Semuh ti ransing bejalaika pengawa ngelaku semua palan pematak temuai .

Kelimpah ari nya ku iya, raban ketuai mega ransing bejalai pengawa dikena nentu peranak Bau enda tinggal ari atur pemansang.

Ku iya, pekara nya berat ngambi semua peranak Bau ulih ngasaika pemansang baka ke disepi di mengeri bukai.

“Semua tu dikena nentu peranak Bau disengkaum dalam semua sistem, atur pemansang ke dilanggur perintah.

“Ngarap ba maya ke ngena jemah, rayat deka meri sukung ngagai perintah ke udah nyendia semua pemansang,”ku Masing nandu.

Festival Tasik Biru diatur 3 hari berunggu berengkah 30 September 2016 nyentuk ngagai 2 Oktober 2016 lalu mayuh aktiviti diatur rambau festival ke dulu agi ari tu dikumbai Jong Regata.

Entara program ke disedia kelimpah pekit lumba perau layar jong iya nya Ratu Tasik Biru, pekit bibat lengan, panggau pemerindang enggau pengawa mandangka servis ari ejensi perintah sereta kompeni.

Kemari mega, Pasukan Gerak Am (Polis) Batu Kawa bisi mandangka demostrasyen nyelamat di Tasik Biru nguna bilun engkabang.

Ba pengawa nya kemari, Masing bisi ngagihka RM20,000 ungkup pengawa ngatur festival ke sama ba taun 2017.

Bela datai ADUN Tasik Biru Dato Henry Jinep, Pemesai Pelilih Bau Inting Nyami enggau orang bukai.-UB

No comments:

| | Copyright © 2014 SARAWAKIANA