Ukai semua pangku pengawa dalam PRS diperebut maya TDC, ku Nissom


KUCHING: Sekeda ari pangku pengawa ke besai dalam Parti Rakyat Sarawak (PRS) enda diperebutla maya Aum Tiga Taun Sekali (TDC) kena 21 nyentuk 23 Oktober tu ba restoren Dinner World di Bintulu.

Sekretari Besai PRS, Datuk Wilfred Nissom, madahka tu bepelasar ari respon ti diterima ari 38 pampang parti di serata nengeri, ti diperati sereta diputuska rambau aum pengawa milih komiti ba indu opis parti kena 6 September tu tadi.

Nissom madahka pangku pengawa ti enda diperebut iya nya presiden, ketuai nembiak enggau indu, sapit sereta mandal ketuai indu.

“Bepelasarka timbal ti diterima ari Aum Besai Ninting Taun (AGM) ari 38 pampang parti (PRS) serata nengeri, sekeda ari pangku pengawa besai enda diperebut dalam TDC Ke-4 ti deka datai,” ku Nissom, ke lalu nyadi Chairman Komiti Pengawa Bepilih madah rambau aum pengarang berita ba indu opis parti, kemari, ke mega digulu Sekretari Komiti Pengawa Bepilih, Edward Kurik.

Pangku pengawa ti deka diperebut iya nya sapit presiden antara penyandang Datuk Joseph Entulu Belaun enggau Datuk Joseph Salang Gandum sereta sapit ketuai nembiak.

Ku iya nambah, kaban kunsil besai, pampang indu enggau nembiak mega deka diperebut.

Ungkup pangku pengawa mandal presiden, Nissom madahka bala komiti pengawa bepilih nerima sepuluh iku chalun ke deka bediri ba lima slot ungkup mandal presiden, tambah enggau ketuai indu enggau nembiak deka terus nyadi mandal presiden ketegal pangku pengawa nya.

Snowdan Lawan nyadi Ketuai Nembiak ke baru, nyilih Liwan Lagang, ti ngelui ari tatak umur 40 taun, lalu Datuk Doris Brodie, nyadi Ketuai Indu lalu sapit iya, Rosalyn Neging.

Lalu Mandal Ketuai Indu iya nya Agnes Ludil.

Nissom mega madahka TDC tu deka digulu urung 635 iku bala delegasyen – 346 iku ari Kaunsil besai, pampang nembiak (125 iku) sereta 164 iku ari pampang indu.

Kaban ari komponen parti Barisan Nasional (BN) – Parti Pesaka Bumiputera Bersatu (PBB), Parti Sa’ati Rakyat Sarawak (SUPP) enggau Parti Demokratik Progresif Sarawak (SPDP) mega bisi dikangau, ku Nissom nambah.

Kepala Menteri Datuk Patinggi Tan Sri Adenan Satem bisi dikangau lalu disadang deka bejadika TDC nya.-BP

No comments:

| | Copyright © 2014 SARAWAKIANA