TRCRC Sedia Melanja Program Ngintu Kampung Di Sarawak



LONG BANGA, Ulu Baram: Chairman Tropical Rainforest Conservation and Research Centre (TRCRC), Tun Jeanne Abdullah, madahka piak sida udah besedia melanja bemacham program ngintu kampung di nengeri tu.

Jeanne ti tepaut ati meda chara Perintah Nengeri ngintu kampung di nengeri tu madahka pengawa ngintu sereta pansik ti dipejalaika nengah Opis Kampaung Sarawak (JHS) iya nya sebengkah pengawa ti beguna endar sereta patut disukung dikena nentuka kampung asal di nengeri tu terus dijaga.

Bini ex-Menteri Besai nya mega minta raban sainstis enggau pemansik berani bejalaika pengawa ngagai pun menua di sebelah kampung ba nengeri tu enggau Sabah, nyerungkai enggau dalam sereta jauh agi, ngiga semua pemaik enggau penguntung ke bisi ba dalam iya, tang ukai enggau chara ngerusak iya.

“Kitai meseti ingat, kampung ulih idup enti nadai kitai, tang kitai enda ulih idup enti nadai kampung.”

“Nengah kampung kitai ulih beridup, nya kebuah lebuh aku betemu enggau JHS sereta nemu pasal program pemansik sereta ngintu, aku berasai gagit endar sereta mayuh ti ulih dipelanja aku,” ku iya.

“Pekara ti beguna iya nya kitai patut bekerejasama, Perintah Nengeri, JHS sereta ejensi-ejensi ke bukai ti bekaul sereta semua piak, dalam pengawa tu,” ku iya rambau bejaku ba pengerami nutup Ekspedisi Saintifik Long Banga 2016, ti diatur bepalan ba Balai Komuniti Kampung Long Banga ditu kemari.

Ngelansa pekara bukai, ex-Menteri Besai, Tun Abdullah Ahmad Badawi, ti nyadi ketuai lumur satu menua keterubah iya merambu sereta nyukung pengawa nempa inisiatif ‘Heart of Borneo’ (HoB), diberi basa bejadika pengawa nutup ekspedisi nya, nyadi sebagi ari program ti dikemansang ari baruh HoB.

Berebak enggau nya, Jeanne ngingatka peranak menua nya, nyema bisi tetemuka utai tumbuh ke tau nyadi ubat nyumanka penyakit kronik baka riman tauka antibiotik, patut ngetan sereta nanam iya mayuh agi, ngambika ulih dijual nyadi produk pemun tauka dipaten, pulaika pemaik sida.

“Kitai di Malaysia kebendar ngembuan mayuh utai tumbuh nyadika ubat tang kitai enggai kiruh, tebal agi kitai nyual daun tauka kulit rangkai sereta chara tu enda ngasuh kitai kaya enggau mujur,” ku iya.

Tang nengah pansik silik sereta dalam agi, asil iya deka nyadi manah agi.

Berindik ari nya, iya ngansak raban pemansik bekerejasama enggau komuniti menua nya, ngelala sereta ngerikod semua penerang bekaul enggau utai tumbuh lalu ngasilka utai ti beguna ari nya lalu manah agi ari ke penerang nya labuh ngagai orang luar lalu beambi ulih ke penguntung ari peranak menua tu.

“Saintis ari serata dunya datai ngagai Sabah enggau Sarawak, mansik asil kampung kitai, diau ditu dua tiga taun, ngiga penerang ari peranak menua tu lalau lebih sida teulihka iya, sida deka nyerungkai lalu mansik enggau dalam agi.

“Bala sida tu, udah nya deka nyual ngagai kompeni-kompeni pengeluar vaksin, vaksin, pharmasautikal sereta bulih nama, PhD enggau pengaya,” ku iya nerang.

“Enti ulih kitai ngepunka pengawa enggau taba chemai, benih tu baka anak mit, iya patut dichemai lalu lebuh udah tumbuh besai sereta urat iya chukup tegap baru kitai nanam baru (ba kampung) ngambika iya tau idup sereta tumbuh enggau manah,” ku iya nandu.

Berebak enggau pengerami nya, Jeanne mega bisi nyuaka surat juluk TRCRC deka ngaul kerejasama enggau Perintah Nengeri sereta JHS dalam pengawa ngintu kampung di nengeri tu.

Sama bisi datai Menteri Muda Pengatur Pengeraja Asal Sarawak, Datuk Naroden Majais ke lalu nyadi Menteri Muda Pemansang Dagang, Sapit Speaker Kunsil Nengeri (DUN) ke mega ADUN Mulut, Datuk Gerawat Gala enggau Kaban Parlimen (MP) Baram, Anyi Ngau, Direktor JHS, Sapuan Ahmad sereta bala ketuai ke bukai.UB

No comments:

| | Copyright © 2014 SARAWAKIANA