Program Lan Berambeh 2016 deka diatur manah


SERIAN: Menteri Penguasa Pemayuh Pengereja Pen­gawa Datuk Seri Richard Riot Jaem deka nentuka program Lan Berambeh 2016 di Kuala Lumpur ke pemadu manah kala dia­tur.

Riot ke nyadi chairman pengatur program ungkup taun tu madah program dikearap ulih matak 7,000 iku peranak Sarawak di Se­menanjung Malaysia datai ngagai Palan Dagang Dunya Putra (PWTC) kena 15 Oktober 2016.

“Lan Berambeh ukai semina program ke bekaul enggau Sarawak, tang ket­egal aku nyadi chairman pengatur pengawa, program mega bekaul enggau bansa Bidayuh,”ku iya.

Iya mansutka jaku nya ba pengerami Makai Lemai St John Taee, Serian ke digulu urung 1,000 iku orang kena malam Hari Enam tu tadi.

Nitihka penerang ari Riot, elemen bidayuh deka dipasuk ba program sehari nya lalu nyengkaum mai Ratu Terjun Malaysia Pandelela Rinong sereta Miss Malaysia World 2014 Dewi Liana Seriestha.

“Pandelela enggau Dewi Liana entara sekeda ke udah ngangkatka bansa Bidayuh ba renggat dunya.

“Ungkup bansa Bidayuh ke ulih datai ngagai PWTC, datai mih lalu bela bekunsi temegah diak kitai ulih bese­mekih ba renggat dunya,”ku iya.

Kelimpah ari nya, seraban 20 iku tim tanda asal ari kampung Taee deka dibai ke PWTC, ngerami program Lan Berambeh.-BP

No comments:

| | Copyright © 2014 SARAWAKIANA