PROFES deka ngatur ICE 2016 kena 18-19 Oktober


KUCHING: Gerempung Pemansang Professionalisma dalam Pelajar Sarawak (PROFES) begulai enggau Palan Pematih Pengajar (IPG) Kampus Miri, Opis Pelajar Sarawak (JPNS) sereta peribit deka ngatur Konferens Antarabansa bekaul Pelajar 2016 (ICE 2016) ti deka diatur dua hari berunggu kena 18 nyentuk 19 Oktober di Hotel Meritz, Miri.

Menteri Pengintu Pengelantang Pendiau, Orang Indu enggau Komuniti Datuk Fatimah Abdullah madah tu seiti chara jalai pemansang ke bala pengajar, ngambi ulih ngemanahka agi pengelandik sida, penemu kelebih agi ngagai pengajar ke endang ngajar di sekula.

“Konferens tu manah ke bala pengajar, laban sida deka belajar penemu baru lalu mantaika bakani sida ngajar nembiak sekula ngambika nembiak ngembuan pengelandik ke ulih berunding panjai lebuh napi subjek ti diajar dalam kelas.

Nya alai, konferens tu ukai semina ke subjek siti aja tang mungkur semua, bakani ka ngasuh nembiak nya berunding sereta bakani gaya tanya pengajar dalam kelas.

Enti pengajar enda berunding, lalu semina nanya ‘mereti ke enda kita?’, tu enda chukup manah. Beratika nembiak nemu ke enda utai ti diajar pengajar sida iya, lalu peratika sida iya berunding tauka enda, bakani gaya tanya ke patut ditanya ngagai nembiak lalu bakani gaya kitai ngajar,” ku Fatimah.

Pengawa ngajar begunaka pengajar berunding ngambika landik ngemutarka penanggul, ukai semina ngingatka fakta, chara ngajar nembiak berunding ngemutarka penanggul, sereta mayuh macham pekara bukai, ku iya.

Opis Pelajar Menua Sarawak (JPNS) beratika konferens tu siti inisiatif ke berat, kena ngemanahka agi chara pengajar ngajar ari ti dipelajar sida iya di maya agi dilatih, lalu chara ke nyentuk bansa tu ke patut dikena belama.

“Nyadi seiku pengajar, pemerat bansa tu ke diguna, laban pengajar enda ulih statik aja laban penemu nya enda statik, ‘pardogogy’ pan enda statik, lalu nambah enggau nya, nembiak kitai ninting taun berubah, sekeda nya ada ba taun ke enda sebaka, diau ba genturung pendiau ke enda sebaka enggau orang bukai.

Pengawa latih ngemansangka profesionalisma pengajar patut digaga mayuh agi,” ku iya.

Fatimah ti mega nyaga pekara bekait enggau Pelajar di menua tu madah pengawa ngemansangka profesionalisma patut nyadi siti pengawa ke seruran digaga.

Baka ‘Higher Order Thinking’ (HOT), tu seiti pemansang dalam dunya pengajar alai nembiak diasuh belajar berunding enggau silik tauka (High Order thinking). Tu gaya modal mensia ke diguna kitai diatu, iya nya landik berunding nyerumba HOT, ku iya.

Iya nandu baru, bedau lama tu tadi, Sapit Kepala Menteri Datuk Amar Abang Johari ba siti aum media bejaku pasal Transformesyen Sarawak, ke disebut iya ‘The Way Forward’.

“Alai pengawa ti digaga Kepala Menteri ke deka ngubah menua Sarawak, iya magi kabinet komiti ngagai 3 bengkah, iya nya: Transformesyen Sosio-ekonomik (bechairmanka Sapit Kepala Menteri Datuk Amar Douglas Uggah Embas), kabinet bekait enggau komuniti dalam transformesyen (bechairman Tan Sri Datuk Amar James Masing), komiti kabinet bekait enggau tikas penau gawa sereta servis (bechairmanka Datuk Amar Abang Johari Tun Openg),” ku iya.

Baruh Tikas Transformasyen Penau Gawa sereta Servis, udah ditetapka KRA (Key Result Area) iya empu, alai siti KRA ke deka dijapai komiti kabinet tu, iya nya mindahka sereta meri kuasa, meri servis enggau ‘scorecard’, lalu ditangkan enggau Pelajar, ku iya.

“Enti kitai deka ngangkatka penyulut pengajar sereta nembiak, kitai bepun ari pengajar dulu laban pengajar orang ke ngajar, klien kitai, iya nya nembiak sekula.

Kitai ngemanahka agi profesionalisma pengajar, ngemanahka agi penemu, pengelandik ngambika kitai bisi pengajar ke bekualiti, nembiak sekula ke bekualiti,” ku iya, lalu nandu baru di renggat opis menteri pelajar empu suah mega ngaga kus kena ngemanahka agi profesionalisma pengajar, lalu baka nya mega ari peribit, sigi diperansangka.

Kelimpah ari nya, Fatimah meri terima kasih ngagai tiga buah kompeni menua tu ke nyukung PROFES, iya nya Sarawak Energy Berhad (SEB), Yayasan Sarawak enggau Sarawak Oil Palm, ke udah nyukung PROFES, lalu tu kali ketiga iya digaga alai ke penudi endar dalam taun 2014.

“Kitai meri peluang ngagai pengajar kilah Miri, Limbang, Lawas sereta sitak ke besemak enggau Miri, baka pengajar ari menua pesisir sama tau enggau konferens tu,” ku iya.-BP

No comments:

| | Copyright © 2014 SARAWAKIANA