Polis nengeri tu deka majak chakah nyaga pengelikun


KUCHING: Polis deka terus chakah dikena nentuka penyalah ngelanggar undang-undang ti dipelin ba nengeri tu ulih terus dijaga.

Nitihku Sapit Direktor Nasat Pengawa Jai (Pengawa Jai Ti Dipelin) Bukit Aman Dato Huzir Mohamed, polis deka terus matau kes ngelanggar undang-undang kelebih agi ti bekaul enggau senyata api.

“Enti diserangkung semua, penyalah ngelanggar undang-undang ti dipelin ti bekaul enggau senyata api agi ulih dijaga. Kami deka terus bebendar betapi enggau isu tu,” ku iya.

Iya madahka pekara nya lebuh dikerandau pengarang berita ba pengerami nutup ‘Kemahiran Menembak Tempur Secara Dekat’ ba Lapang Sasar Briged Pasukan Gerakan Am (PGA), Batalion 11 di Jalan Field Force ditu, ensanus.

Sama bisi datai, Ketuai Opis Nasat Pengawa Jai (JSJ) Sarawak Dato’ Dev Kumar enggau Sapit Komander PGA Briged Sarawak ACP Zulkifli Jonet.

Huzir madah, perintah mega bejalaika atur ke patut iya nya neritka agi atur ba garis entara menua, ke lalu dikena nagang pengawa mai senyata api tama belalai.

“Aku arap (nengah kerejasama perintah) kitai ulih mutarka penanggul tu,” ku iya.

Sarawak taun tu ngerikod tiga kes timbak mati iya nya di Jalai Long Bridge, Sibu bulan Januari, kes munuh Bill Kayong di Miri bulan Jun enggau kes munuh di kebun lada Kpg Jugan, Bau ba hari ke sama.

Ngenang silik pasal nya, Dev madahka ketetiga kes nya bekenaka senapang patah ti enda direjista.

Lebuh dipinta ngenang pasal pengawa ngerampas tujuh senyata api ba rumah Lee Chee Kiang ke entara seiku ari orang ke dipelabaka udah ngereja penyalah ba kes Bill Kayong, iya madahka, semina permit pistol enggau senapang aja dikemendarka polis.

Lalu lisin lima iti agi senapang patah ke ditemu ti dikeluarka Opis Pelilih , iya nya ngambika dikena polis bantu ba Kompeni Tung Huat.

Polis semina deka ngeluarka seiti lisin ungkup seiti bansa senyata api, kelimpah ari peminta nya bisi kebuah ti patut ngembuan senyata api kedua, ku iya.

Dev bejaku baru madahka, polis mega benung mansik mekanisme dikena matau pengawa ngeluarka lisin enggau penyampau senapang patah di nengeri tu.

“Kami ukai deka ngambi kuasa (ngeluarka permit senapang patah) ari nengeri tang numbuhka mekanisme dikena ngelala bagi senyata api ke diempu orang seseiku ba nengeri tu,” ku iya.-BP

No comments:

| | Copyright © 2014 SARAWAKIANA