Pengeransing SDGA Ngangkatka Tikas Pelajar Nembiak Dayak Patut Dichunto



BINTULU: Pengeran Serakup Graduet Dayak Sarawak (SDGA) Bintulu ba pengawa ngatur aktiviti meri peransang ngagai bala nembiak sekula kelebih agi sida ke napi peresa Sijil Pelajaran Malaysia (SPM) enggau Sijil Tinggi Persekolahan Malaysia (STPM) patut dichunto semua piak dalam pengawa ngangkatka tikas pelajar nembiak sekula ba bagi menua tu kelebih agi bansa Dayak, pia ku Kaban Kunsil Nengeri (ADUN) Samalaju, Majang Renggie.

Ku iya, taja SDGA Bintulu manggai ba taun kedua iya ditumbuh, iya nya kena 5 Mei 2015, serakup tu terus chakah dalam ngatur program meri peransang ngagai bala nembiak sekula ba bagi menua tu ti deka napi peresa perintah.

“Semangat gempung ukai dikuasa perintah (NGO) ke bansa tu ti kitai (perintah) inginka alai negika pekara pemansang enggau pelajar dalam nangkup peminta perintah Sarawak ti deka meda mayuh agi orang bepenemu sereta pintar ari peranak asal nengeri tu,” ku iya.

Majang mansutka jaku nya rambau bejadi pengawa nutup Program Meri Peransang Apai Indai enggau Nembiak 2016 Sekula Sekondari (SMK) Asyakirin ke diatur bepalan ba balai mayuh guna sekula nya kena lemai Hari Enam tu tadi.

Ku iya, program meri peransang nya dituju ngagai bala apai indai enggau chalun ke deka napi peresa SPM enggau STPM taun tu, diasaika engkeman endar laban mantu dalam meri peransang genap iku chalun peresa perintah ngambika belajar bebendar sereta meri pemerat ngagai pelajar enggau peresa ke deka ditapi sida ila.

Ku iya nerang, pekara ti beguna endar iya nya program ti berambai jaku ‘Nuju Penyulut ba Pengidup Jemah’ endang patut nyadi program ninting taun SDGA enggau sekula dikena meri peransang ngagai bala nembiak ke deka napi peresa perintah.

“Aku dipadahka program meri peransang keterubah ke diatur SDGA Bintulu iya nya Program Peransang Penemu 2015 ungkup nembiak sekula ba SMK Tatau ke udah diatur sida enggau mujur,” ku iya.

Berebak enggau nya, Majang mega mantaika pengaga ati ngagai bala kaban SDGA enggau bala pengajar SMK Asyakirin laban mujur ngatur program meri peransang ke bansa nya enggau ngagauka pengelicha ti ngembuan pengelandik baka Dr Dusit Jaul enggau Dr Shafie Lugom ke endang bisi penemu mayuh dalam pekara pelajar ba nengeri tu.

Ngelansa pekara bekaul, iya mega bisi ngemendarka bantu sepenyampau RM 5,000 ungkup SDGA Bintulu, RM 5,000 da agi ungkup Serakup Apai Indai enggau Pengajar (PIBG) SMK Asyakirin sereta RM 3, 000 ungkup Panitia Jaku Iban SMK Asyakirin.

Chairman SDGA Bintulu, Cornelius Roy enggau Prinsipal SMK Asyakirin, Sim Thiam Huat sekeda bala ke bisi datai.-UB

No comments:

| | Copyright © 2014 SARAWAKIANA