Pemulai Kaban TERAS Ngagai SPDP Deka Ngenegapka BN



KUCHING: Parti Tenaga Rakyat Sarawak (TERAS) begempung sereta teulihka sukung baru dalam beberapa bulan pengudah pengawa bepilih tembu dipejalai.

Tanya ba runding rayat diatu, sekalika kaban Teras ditetap pulai baru ngagai Parti Demokratik Progresif Sarawak (SPDP), ari sukut runding ngenang kaban TERAS nya ex-kaban SPDP sereta kaban ke baru.

Ex-Presiden SPDP enggau TERAS, Tan Sri William Mawan Ikom diperati deka nikal pulai ngagai SPDP – parti ti ditengkebang iya dalam taun 2002 suba.

Iya mansutka jaku tu rambau aum pengarang berita pengudah pengawa ngelancharka bup iya “Reflections – A Journey of Hope, Aspiration and Perserverence” ba Hotel Imperial ditu kena 21 September 2016 ke alai iya empu enggau ari tebuka deka nikal baru ngagai SPDP.

Kaban Parlimen (MP) Saratok ti mega Kaban Kunsil Nengeri (ADUN) Pakan engka nadai parti tang dipeda keran deka ngasuh kaban ari kededua parti begulai baru dikena ngenegapka agi penyerakup dalam Barisan Nasional (BN).

Enti nyema nyadi, nya deka nyadi pemulai ngagai parti TERAS enggau SPDP baka ti nerima pemulai anak ke lama mawa.

Mawan mega enda ngelalaika peneka diri lebuh iya madahka dudi hari bala penyukung iya ari TERAS deka begempung baru enggau SPDP.

Lebuh ngenang dalam agi ku Mawan: “Nyema bala kita bisi macha bup tu (lambar lapan ba bup Reflections), aku bisi madah, Dipelabaka kitai deka beserakup baru enggau SPDP. Dipelabaka mega kitai deka berakup enggau Parti Rakyat Sarawak (PRS) sereta Parti Pesaka Bumiputera Bersatu (PBB).Endang seruran bisi pilih. Pekara ti dipeda kitai diatu iya nya mayuh macham pejal politik ngelingi kita (kuasa) ngiga kaban enggau begempung.”

Pekara ngelantangka ati ngagai kededua parti udah ngelempaika hak ngagai Presiden SPDP Datuk Seri Tiong King Sing kena 19 September tu tadi lebuh iya mansutka jaku deka ngambi Mawan enggau bala penyukung iya pulai baru ‘laban sida endang nadai kala bemunsuh’.

“Tan Sri William Mawan enggau bala penyukung iya endang dikelaluka nikal pulai enggau nadai sebarang penetap laban SPDP ukai diempu aku. Tang bala kunsil besai deka baum nyema sida endang bebendar deka nikal pulai baru ngagai kami,” ku iya seraya madah taja Mawan ex-presiden SPDP, tang iya (Tiong) deka neju ngagai bala kunsil tetinggi nentuka nama pangku pengawa ti engkeman ditangkup iya.

“Ngagai bala penyukung iya, kami mega ngelaluka pemulai sida. Tang kami deka beratika sida dulu sebedau kami nerima sida nentuka sida nurutka prinsip BN,” ku MP Bintulu.

Enggau penama kaban ari Teras enggau Parti Rakyat Bersatu (UPP) ngagai SPDP, tu deka ngemuntangka agi pengawa Chairman BN Sarawak, Datuk Patinggi Tan Sri Adenan Satem ti mega deka meda dua parti bekaban enggau BN ulih diaku ke dalam BN tang udah ditulak SPDP enggau Parti Sa’ati Rayat Sarawak (SUPP).

Dalam randau ekslusif enggau The Borneo Post bedau lama ke udah, Adenan madahka mar deka nerima UPP enggau Teras ke dalam BN berindik ari prinsip ‘pekat’ dalam tusun BN.

“Seagi sida nyukung BN, nya aja ke dipinta aku. Tang nyema sida minta diri nyemilik BN, SPDP deka nulak, SUPP deka nulak. Ketegal prinsip ‘pekat’ tu sida enda diterima tama ngagai BN.

“Lalu nyema sida ningkah, aku sigi nadai daya agi,” ku Adenan madah ngagai The Borneo Post ba rumah iya di Santubong kena 17 September tu tadi.

Mawan enggau bala penyukung iya ari TERAS ulih lantang nyintak seput diatu pengudah pemulai sida diterima SPDP. Berita ke baru ari Tiong deka muka jalai ti manah ngagai bala kaban TERAS, nyadi kaban BN laban TERAS semina nyadi parti kaling BN lalu iya enda diterima ke dalam BN pengudah ditulak SPDP.

Betapi enggau pemar nya, Mawan enggau bala penyukung iya udah nguji nyemilik PBB tang asa laban parti (PBB) enda ulih nerima sida.

Ilapka pekara nya, bala ketuai pampang enggau kaban TERAS ari serata nengeri udah minta Mawan nikal pulai lalu ngiring parti nya. Sida ngaga deklarasyen rambau gempuru ti diatur ba Rumah Rehat Saratok kena 31 Julai, Restoren Rejang kena 27 Ogos sereta Hotel Kuching Park kena 20 September ke alai Mawan dikangau nyadi temuai dipebasa.

Bala sida udah netapka baru Mawan nyadi Presiden TERAS berindik ari pekara ti dikemeratka sida sebedau neruska agenda parti. Tang tetap nyata sereta bisi bisi penegap ba komitmen ngagai BN, lalu bala ketuai ba renggat Perintah Nengeri enggau Perintah Besai.

Penyerakup enggau penegap politik dalam BN seruran dipanggai pemadu tinggi dalam ati enggau runding bala ketuai parti ba renggat nembiak redak sereta kaban parti.

Nya alai, penyerakup enggau penegap SPDP deka nempa BN tegap agi sereta majak begempung lalu teguh ngerembai ke serata nengeri.-UB

No comments:

| | Copyright © 2014 SARAWAKIANA