Kuntau Iban Iatut Dikemansang Nyadi Lumba Enggau Main Moden: Mabong



KUCHING: Kuntau Iban semina ulih dikemansangka nyadi lumba enggau main moden enti diserara ari dipelajar belalai,mistik enggau pengarap lama.

Akademi Gerempung Iban Dayak Sarawak (tauka Asadia) ti betuaika Mabong Unggang madah, iya enggau sekeda bala bukai agi ngembuan juluk deka numbuhka gerempung ti direjista bisi kaul enggau lumba sereta main moden seraya nyukung Kuntau Iban nyadi lumba sereta seni.

Ku Mabong, mayuh Kelang di serata Sarawak tang penumbuh sida agi dipelalai Guro ari ditemu mensia mayuh.

Siti ari pekara ba latih ti mengkang dikemeranka iya nya, pengawa Miring ba kelang ngambika diberekat lalu se-mengat dilindung ari semua pemar.

Ku iya, siti pekara ti mengkang dipechaya iya nya Kelang endur bejalaika latih pengelandik bekuntau nya dipelalai ari orang bukai enggaika maya pelatih nya benung belatih bekuntau, sida diengkila orang bukai lalu orang ti engkila nya deka landik agi bekun-tau ari sesapa ti belatih bekuntau ba kelang pengudah sida nembuka latih nya ila.

Ba penemu Mabong, endang bisi kebuah ti amat Kelang ngaga latih nengah chara belalai.

Nya ngambika orang bukai kelimpah ari pelatih enchuri belatih kelebih agi ba sentang bungai, buah enggau singkang ti diajar Guro, ku iya.

“Ba runding aku kitai ( Iban) agi kelalu sempil enggau adat asal kitai. Pengawa ngelalaika Kelang, Guro enggau pelatih nya sebagi ari adat asal kitai. Kelimpah ari nya, Guro mega nyaga penemu sida enggau manah alu semina bekunsika penemu nya enggau pelatih ti dipechayaka iya aja,” ku iya lebuh berandau enggau Ketuai Nembiak Sarawak Dayak National Union (SDNU) Churchill E. Drem kena Hari Dua tu tadi.

Churchill mega protem presiden National Iban Kuntau Association (Nika), lalu Mabong nyadi sekretari iya.

“Pengawa mantaika pengelandik bekuntau Iban nadai kala dikereja sebedau tu laban nya bisi kaul enggau isu hak pengempu Kuntau sereta penchayaka pengarap lama. Aku bebasaka orang ti enda mantaika buah enggau bungai kun-tai ngagai mensia mayuh. Aku mega pechaya sida bisi kebuah ti patut ngaga pekara nya. Taja pia, Asadia milih mantaika sekeda buah Kuntau Iban ngagai mensia mayuh laban aku pechaya main asal nya tau ngemegah, mengkang diempu lalu dikesayauka bansa Dayak,” ku Mabong.

Ku Mabong, kena 27 Ogos tu tadi, segerup 20 orang ti rinduka Kuntau Iban nyengkaum Guro Patrict Tuat udah enggau ngaga filem ba palan rekreasi ti di Ranchan Serian.

Semua sida nya ke bendar kaban Asadia magang.

Dokumentari nya digaga RTM TV1 begulai enggau kompeni Dermaga Seni benung digaga RTM deka ngasilka 13-episod dokumentari ti dikumbai “Gelanggang” mantaika penyelai 13 bengkah pengelandik ngenanka diri ti dikembuan pupu bansa di Malaysia.

Mabong meri terima kasih ngagai RTM enggau Dermaga Seni laban udah milih Kuntau Iban nyadi sebengkah ari nya sereta deka dikemeratka.

“Aku mega meri terima kasih ngagai presiden Sadia Sidi Munan ketegal udah meransang kami ngelakuka main asal bansa Iban. Enda tinggal mega ngagai Churchill ti udah ngemataka pengawa ngaga filem nya begulai enggau produser,” ku iya seraya madah, enti RTM enggau Dermaga Seni nadai pengerindu ba pengelandik ngenanka diri, juluk ngaga dokumentari Kuntau Iban nya enda mujur dipejalaika.

Ku iya, semina tiga ari 14 iti bansa Kuntau Iban dipandang ba dokumentari nya tauka ngagai mensia mayuh baka Lang Ngindang, Tepis Memaloh enggau champur Spring 12 enggau Spring 24, ku iya.

Ku Mabong: “ Aku arap endar enti kitai deka ngemansangka Kuntau Iban nyadi lumba enggau main sereta pengelandik ngenanka diri, kitai enda tau enda mantaika nya ngagai mensia mayuh sebaka enggau pengelandik ngenanka diri bukai nyengkaum Taekwondo sereta Karate,” ku iya.

“Kuntau Iban semina dipeda nyadi sebagi ari main asal aja. Kitai ( bansa Iban) patut ngambi inisiatif ngidupka baru sereta nger-embaika Kuntau Iban ngambika enda semina dipeda nyadi main asal tauka pengelandik ngenanka diri aja,” ku iya baru.

Ku iya, bepelasarka penyampau Serakup Kuntau Dayak (SKD) ti regas, gerup whatsapp bisi 150 iku kaban, ke alai nembiak rebak ba-ru deka meda Kuntau Iban nya dikemansang nyadi lumba enggau main moden laban pengelandik ngenanka diri nya diatu majak dikerinduka.

“Aku arapka mayuh agi orang masuk kelas Kuntau Iban sereta nyadi Guro. Kelimpah ari nya kitai patut ngembuan sebuah organisasyen ngemataka main asal nya sereta hak Guro, orang ti ngemeran enggau ti rinduka main nya. Ngarapka nembiak rebak baru ulih numbuhka organisasyen bukai dikena matak pengerindu ba kuntau sereta ngemansangka sistem ti standard ke tuju lumba enggau main moden sereta nambahka penyam-pau orang ti rinduka main nya,” ku iya.

Lebuh ngaga filem dokumentari kena 27 Ogos nya, Dermaga Seni diarika Shafiq Mohd Nazri ke mega nyadi produser filem, Rizal Busu enggau direktor Deen Salih.

Konsep tetiap episod deka mandang dua iku ti belaban enggau pangan diri nguna pengelandik bekuntau lalu jurujaku deka nyeritaka peneleba iya lebuh nguji belajar kuntau ari guro.

Dokumentari nya mega deka mandangka interbiu enggau guro lalu pekara ti dikerandau nadai kaul enggau sensitiviti pupu bansa, jalai pengarap sere-ta pekara bukai.

Batang tuju dokumentari tu digaga ukai semina dikena ngelakuka pengelandik ngenanka diri di Malaysia tang mega matak pengerindu bala nembiak bela-jarka nya.

Nya mega deka mandangka menua Malaysia ti kaya enggau main sereta adat asal.-UB

No comments:

| | Copyright © 2014 SARAWAKIANA