KKLW Ngarap Diungkupka Mayuh Agi Belanja



KUCHING: Opis Menteri Pemansang Menua Pesisir enggau Kandang Menua (KKLW) ngarapka diung­kup belanja ti besai agi ari taun sebedau tu dalam Bajet 2017, ngambika ulih dikena bejalaika projek pemansang di serata menua kelebih agi di menua pesisir Sarawak.

Sapit Menteri KKLW, Datuk Alexander Nanta Linggi madah, agi mayuh pro­jek pemansang menua pesisir ke patut dipejalaika sereta begunaka ungkup belanja ti lebih besai.

Bajet 2017 dipelaba deka dibantaika Menteri Besai Datuk Seri Najib Tun Razak di Parlimen kena 21 Oktober tu.

“KKLW ngarapka dalam Bajet (2017) ti dibantaika kena 21 Oktober tu di Pali­men, bulih ungkup belanja ti mayuh agi ari taun tu (2016), tambah mega KKLW endang bisi ngenataika peminta nya ngagai Opis Menteri Wang.

“Kebuah kami (KKLW) minta ungkup belanja ti mayuh agi laban deka neruska pengawa ngemansang baka ngaga sereta ngemanahka agi jalai alun lalu nyendiaka bekal elekterik 24 jam di menua pesisir, kelebih agi di Sarawak enggau Sabah.

“Nya alai KKLW amat ngarapka Opis Menteri Wang ngemendarka ungkup be­lanja ti mayuh agi (dalam Bajet 2017),” ku iya lebuh dikerandau raban pengarang berita.

Taun nyin kemari ku iya, KKLW diungkupka belanja lebih RM10 billion lalu ari penyampau nya bisi RM5.4 billion dikena bejalaika pe­mansang lalu laluh diagih nga­gai piak pengatur pengawa.

“Ari penyampau ung­kup belanja pemansang nya (RM5.4 billion) dikena opis menteri ngaga sereta ngema­nahka agi jalai alun di Sarawak ditu ti sepemanjai lebih 700 kilometer nguna ungkup be­lanja RM1 billion,” ku iya.

Dulu ari nya Nanta nyuaka geran perintah sepenyampau RM36,000 ngagai lapan Gerempung Ukai Dikuasa Perintah (NGO) nyeng­kaum Gerempung Penulis Sarawak; Tetuan Jawa­tankuasa Sukan Kebajikan dan Kebudayaan IPTAR enggau Kelab Sosial sereta Rekreasyen KPLB.

Nambahka nya, Majlis Kebajikan Kebudayaan dan Riadah Jabatan Pendaftaran; Sarawak Dayak Graduate Association (SDGA); Kaunsil Pemansang Pelajar Jaku Iban; JKKK Rumah Reba enggau Biro Indu Rh Banta Kubal Batu.

“Sehari tu aku meri geran perintah ngagai lapan beng­kah NGO ngambika bisi dikena sida bejalaika aktiviti, lalu aku ngamatka semaya aku,” ku Kaban Parlimen Kapit nya seraya madahka sebagi ari ke udah nerima geran nya.-UB

No comments:

| | Copyright © 2014 SARAWAKIANA