KGBS Nyukung Pemutus KPM



KUCHING: Atur pengawa Opis Menteri Pelajar ti benung ngiga chara dikena ngurangka tanggungpengawa raban pengajar di menua tu nerima positif sereta timbal ti manah ari Kesatuan Guru Bumiputera Sarawak (KGBS).

Ahmad Malie ti nyadi Presiden KGBS madah, ngarapka pekara nya amat nyadi nyata sereta diputarka enggau lengkas.

Kebuah pia ku Ahmad, laban isu nya baka ti dipadah Ketuai Direktor Pelajar Malaysia (KPPM) Tan Sri Dr Khair Mohamad Yusof ti timbal peminta Presiden Kesatuan Perkhidmatan Perguruan kebangsaan (NUTP), ke alai isu lama ti suah udah dibantaika Gempung Pengajar.

“Lebuh Tan Sri KPPM mantaika juluk deka ngurangka tanggungpengawa raban pengajar, KGBS amat positif enggau pemutus Opis Menteri Pelajar Malaysia (KPM).

“KGBS nerima manah penerang Tan Sri KPPM nya sereta ngarapka penerang nya nyadi nyata enda lama agi,” ku iya madah ngagai Utusan Borneo.

Ahmad mansutka pekara nya lebuh ti nimbal bekaul enggau penerang Ketuai Direktor Pelajar Malaysia Tan Sri Dr Khair Mohamad Yusof di Petaling Jaya ensanus ti madahka Opis Menteri Pelajar benung ngiga chara ngurangka tanggungpengawa pengajar ti ngujung mayuh pengajar ngetu ari servis ngajar.

Khair madahka opis menteri iya nemu raban pengajar betapi enggau penanggul, penusah enggau ke bukai lalu nya nyadi ninting hari.

“Kami ulih meretika pengajar berasai ‘stress’ nyengkaum nyendiaka rengka dikena ngajar ninting hari,” ku iya diambi bejaku baka ti diripot ba sebengkah portal online.

Kelimpah ari nya dalam portal online ke sebaka, Presiden NTUP Kamarolzaman Razak madahka mayuh pengajar ngetu ngajar pengudah urung dua taun laban betapi enggau tanggungpengawa ti mayuh.

Kamarolzaman bepenemu opis menteri patut ulih beratika pengawa dikereja pengajar sereta enda meri sida (pengajar) mayuh tanggungpengawa.

“Sida kelalu mayuh keretas kerja. Nya ngujungka sida ‘stress’.

Nambahka nya Ahmad ngarapka mayuh agi isu bukai nyengkaum pengelantang pendiau raban pengajar ulih diputarka KPM kelimpah ari isu tanggungpengawa pengajar ke mayuh.

“KGBS ukai semina ngarapka KPM ulih mutarka isu tanggungpengawa mayuh ti ditapi raban pengajar aja tang mega isu bekaul enggau pengelantang pendiau baka ti kala dikenataika Gempung Gerempung Pengajar sebedau tu.

“KGBS amat temegah ati enti isu ti dibataika ngelama tu ulih diputar ke pengelatang pendiau raban pengajar,” ku Ahmad.UB

No comments:

| | Copyright © 2014 SARAWAKIANA