Jaku Iban Agi Idup, Majak Mansang Ketegal Penyiru



KUCHING: Jaku Iban agi idup, majak manah sereta mansang ketegal bisi penyiru, pemerat sereta pengerindu ke jaku Iban ti ukai semina dikena komuniti Iban aja tang bemacham pupu bansa di menua tu.

Kepala Menteri Datuk Patinggi Tan Sri Adenan Satem madah, lebuh ngenang pasal jaku sesiti komuniti, komuniti ke endang bisi adat asal sereta jaku kediri empu, tau dikesema baka orang di menua Amerika kelia, baka komuniti baka Apache, Cheyenne, Arawak enggau komuniti orang asal bukai, engka nadai agi orang di Amerika ti bisi ngena jaku nya agi, tang ngarapka jaku komuniti asal orang Amerika nya bisi ditaruh dalam digital, dalam muzium sida, ku Adenan.

“Kitai enggai meda jaku Iban nyadi baka nya, enda diintu manah, enda dikena nyadi jaku laban enggaika datai ba siti maya ila, jaku Iban punas pia aja.

“Jaku sesebengkah komuniti nya mandangka identiti komuniti nya,” ku Adenan.

Iya madah munyi nya bejadika Kamus Iban-English ti digaga Dayak Cultural Foundation (DCF) di sebuah hotel ditu, kemari.

Ku iya baru,kamus Iban-English nya mandangka identiti komuniti. Baka ke diatu ku iya, udah bisi kamus English-Bidayuh ti digaga William Nais kelia dalam kandang 20 taun ti udah.

“Aku meransang komuniti bukai ngaga pekara ke sebaka, kami sigi meransang komuniti di menua Sarawak tu ngintu jaku sida iya enggau cheremat,lalu enti ulih gaga ke kamus, bup tauka dirikod ngambika jaku nya enda punas,” ku iya.

Kelimpah ari nya, iya madah rayat di Sarawak endang seruran begulai beserakup enggau pangan diri kenyau ari kelia menya.

Nyauka ninting maya, aku seruran ngelalau bala menyadi kitai di Semenanjung Malaysia, lebuh kitai bejaku pasal Bumiputera di Semenanjung, urung 99.9 peratus nya Melayu Islam, lalu enti iya Bumiputera di Sarawak tauka di Sabah, ukai semua ti Melayu Islam.

Baka di Sarawak, lebih 40 peratus nya komuniti Iban, Bidayuh enggau Orang Ulu, lalu enda semua sida iya Islam tang mayuh agi Kristian.

“Nya alai, bisi kebuah bansa asal tu diberi kelala lalu ukai dalam kategori ‘lain-lain’. Semua komuniti tu pan deka dikelala laban sida orang ke bisi adat asal sereta jaku kediri empu,” ku iya.

Adenan ti mega Menteri Pengatur Pengeraja Asal enggau Rampa Menua madah baru, pengawa komuniti Iban bejadika kamus English-Iban tu mandangka sida bisi adat asal sereta ‘tamadun’.

“Diatu kitai sama udah maju baka bansa bukai lalu ukai agi baka maya jeman koloni menya, lebuh mayuh bengkah jaku etnik ditu dikena ketegal semina deka nemu aja, tang jaku nya enda tau enda dipelajar, dikena nyengkaum ba tikas sekula sekondari, ngambika jaku Iban nya dikena sereta idup belama,” ku iya.

Lebuh manding penyama leka jaku Iban enggau jaku Melayu, taja pan bebida munyi sebut, iya pechaya nya asil ari ulah begulai enggau pangan kenyau ari kelia menya ti mandangka pemayuh pupu bansa kemaya hari tu.

Ba sentang jaku Iban dipelajarka di sekula, Adenan madah iya nguji deka ngubah sekeda ari polisi pelajar di Sarawak.

“Kitai enda ulih nitih pengawa ke digaga di Kuala Lumpur, laban ‘penyama’ nya ukai semua reti penyerakup, tang ‘mayuh bengkah’ reti nya ulih nerima bansa, pengarap pangan diri.

“Aku ngarapka ubah nya deka bepun ari pengajar laban kitai ngembuan mayuh pengajar ti datai ari menua tu empu.

“Perintah Besai nanya aku bakani ku gaya kitai deka ngadu polisi pelajar kitai? Aku semina nyaut peratika standard sekula dulu. Aku udah lelak endar ngapil ngagai Perintah Besai, aku lelak meda sekula kitai agi mayuh enda disikap ngena perengka guna ti manah,” ku iya.

Sama bisi ngulu pengerami nya kemari, Sapit Kepala Menteri ti mega chairman DCF Datuk Amar Douglas Uggah Embas, patron DCF Datuk Patinggi Tan Sri Alfred Jabu enggau bini iya Tan Sri Empiang Jabu, Menteri Perengka Guna Mensia Mayuh (Bekal Ai Beresi) Datuk Dr Stephen Rundi anak Utom, Menteri Muda Pemansang Infrastruktur Datuk Talib Zulpilip enggau bini iya Datin Zaleha Talib.-UB

No comments:

| | Copyright © 2014 SARAWAKIANA