‘Double Entry Visa’ Benung Diperunding Diatu: Wahab



KUCHING: Opis Menteri Dagang Temuai merambu deka numbuhka ‘Double Entry Visa’, lalu pekara nya diatu benung dalam renggat diperundingka.

Chairman Kunsil Dagang Temuai Sarawak, Datuk Abdul Wahab Aziz madah, nya deka nambahka agi pemayuh temuai ari menua tasik nemuai ke nengeri tu.

“Diatu Perintah Sarawak nengah opis menteri dagang temuai benung dalam renggat berandauka pasal Double Entry Visa ngambika ulih meri (servis) ti manah ngagai temuai ari menua tasik kelebih agi ari menua China.

“Nya alai opis menteri benung berandauka pekara tu dikena ngenukuka Double Entry Visa ulih dipejalaika enggau lengkas.

“Laban diatu, bisi sekeda temuai nya datai nengah Brunei, Sabah enggau Labuan, enti ulih disambung terus ke Sarawak nya chukup manah, dipelabaka urung 10 ngagai 20 peratus temuai ulih datai ke nengeri tu,” ku iya.

Wahab mansutka pekara nya ba aum pengarang berita pengudah bejadika Program ‘Misi Pelancongan Xplore Johor ke Kuching’, ti diatur Kaunsil Dagang Temuai Johor ba sebuah hotel ditu, kemari.

Nambahka nya lebuh bejaku seraya bejadika program nya kemari, Wahab madahka industri dagang temuai nengeri tu patut ngiga produk dagang temuai ti baru dikena matak mayuh agi temuai datai ke nengeri tu.

“Industri dagang temuai nengeri tu patut matau kandang endur baru dalam sekeda sektor ti ulih nyadi produk dagang temuai baka di mengeri tauka nengeri,” ku iya.

Kelimpah ari nya ku iya, kededua piak Kaunsil Dagang Temuai Sarawak enggau Kaunsil Dagang Temuai Johor ulih nempa kerejasama dikena nyungkak industri dagang temuai ba kededua nengeri.

“Baka temuai ari menua China ti ngena penerebai terus ke Johor Bahru ulih mega terus disambung ke Sarawak, tu ulih nguntungka kededua piak Johor enggau Sarawak.

“Pia mega temuai ari menua Singapura mayuh datai ke Johor, tang enda mayuh temuai ari Singapura nya lanjur datai ke Sarawak. Nya alai kitai patut mansik sentang ni pengelemi tu sekalika bisi pengelemi ba pengawa ngelaku dagang tauka bisi pengelemi bukai,” ku iya.

Sama bisi datai ngagai pengerami nya kemari Direktor Dagang Temuai Johor, Gadaffie Abdul Aziz enggau ke bukai.-UB

No comments:

| | Copyright © 2014 SARAWAKIANA