Bulan Merdeka Diintu Kena Negapka Runding Rayat



KUCHING: Atur ngintu pengerami Bulan Merdeka dikena ngenegapka runding rayat talukka menua sereta ngambika rebak baru nemu lalu ngingatka sejarah Malaysia enggau Sarawak.

Menteri Kereja Raya Datuk Seri Fadillah Yusof madahka, nya alai rayat menua tu lebih agi rayat nengeri tu dipinta anang mudah tekuing runding ketegal penemu pabu sekeda orang ti enda setuju Bulan Kemerdekaan diintu.

“Bisi sekeda piak ti betanyaka nama kebuah kitai patut nyambut Hari Malaysia, nama releven Hari Malaysia tauka Hari Merdeka ke disambut di Sarawak.

“Ditu aku deka madahka iya nya kitai endang amat patut sereta beguna nyambut Bulan Kemerdekaan dikena ngangkatka penegap runding talukka menua sereta ngingatka sida ti udah bebendar ngetanka menua kelia, lalu ngajar orang biak meretika sejarah,”

“Nya alai anang kelalu terunda enggau penemu ke ulih ngeruga penyerakup ke lalu ngujungka penegap runding nasionalis kitai lenyau ketegal salah sangka,” ku iya.

Fadillah mansutka pekara nya lebuh ke nutup program Kayuhan Patriotik Merdeka Funride 2016 ke diatur BTN enggau kerejasama Kelab Berbasikal Matang Jaya (MJCC) ba tengah laman Bangunan DUN Lama ditu, pagi kilah ensana.

Iya ke nyadi Kaban Parlimen (MP) Petra Jaya mega madahka menua tu ngintu Hari Malaysia iya nya 16 September, ke dikena ngangkatka semangat merdeka.

Kitai ngarapka rayat Malaysia ngembuan runding ke tegap dalam ngetanka menua merdeka sereta ulih nempa penyerakup nyadi sebengkah menua Malaysia, ku iya.

“Dalam konteks Sarawak, kitai mega bisi ngintu 22 Julai dikena ngingatka Hari Merdeka nengeri kitai.

Berebak enggau tu lebuh ke ngenang program Merdeka Fun Ride ‘Kayuhan Patriotik’ 2016, iya madahka nya ngayanka penegap runding kitai ke nyadi rayat Malaysia talukka menua tu.

“Nengah program ti baka tu udah ngayanka kitai sayauka menua kitai Malaysia ke udah merdeka,” ku iya.

Sama bisi datai ba pengerami nya, Kaban Kunsil Nengeri (ADUN) Samariang Sharifah Hasidah Sayeed Aman Ghazali, ADUN Tupong Fazzrudin Abdul Rahman, Datuk Bandar Dewan Bandaraya Kuching Utara Datuk Abang Abdul Wahap Abang Julai enggau ke bukai.-UB

No comments:

| | Copyright © 2014 SARAWAKIANA