Anang natak runding maya ngelangkar projek

 

KUCHING: Raban injinir tauka konsultan di nengeri tu diperansang anang natak runding lebuh deka bejalaika pengawa ngelangkar sesebengkah projek jemah ila.

Sapit Kepala Menteri, Tan Sri Datuk Amar Dr. James Jemut Masing madah, nya ngambika sesebengkah projek ti digaga nya ulih meri mayuh penguntung ngagai raban bansa.

Ambika chunto bekaul enggau Projek Hidro Elektrik (HEP) di Batang Ai, ba kandang endur nya bisi palan pengentap pendiau baru tang peranak dia be-tapi enggau penanggul suntuk ai taja pan semak sida bisi pegung ke besai tang enda ulih meri pengelantang ngagai sida, ku iya.

“Aku agi baru dalam pekara tu, tang sepekara ke deka dipadahka ngagai sida (injinir tauka konsul-tan), nyadi seiku injinir kita enda patut natak runding kita.

“Baka ba (HEP di Batang Ai) sistem ke digaga semina ulih dikena ngasilka kuasa karan aja tang ukai dikena nyendiaka bekal ai. Nama kebuah langkar (HEP) nya suba enda beratika ai ke pansut ari turbin ulih dikena peranak ke diau besemak tekat ai nya. Injinir patut ulih melabaka bisi guna ai (ari tekad) nya jemah ila.

“Di menua bukai, HEP mayuh tuju, keterubah iya nya dikena nyendiaka kuasa karan, kedua miti-gasyen (dikena nagang bah), lalu tuju ketiga iya nya entali ai. China suah ngemeranka chara nya.

“Perambu tu ungkup projek jemah ila lalu berebak enggau tu mega patut mansik bakani ngemeranka chara nya ba tekat ai ke udah dikembuan kitai diatu,” ku iya.

Menteri Pemansang Infrastruktur enggau Perengka Pengangkut mansutka pekara nya ngagai raban pengarang berita ba bilik baum opis menteri iya ba Bangunan Baitul Makmur ditu, kemari.

Dulu ari nya iya nerima penemuai raban Gerempung Konsultan Injinir Malaysia Pampang Sarawak ti diketuaika Chairman gerempung nya, Ir. William Tan Khoon Lee.

Nitihku iya, Tekat Ai Bengoh ti digaga nya mega semina dikena nyendiak bekal ai aja , tang enda dilangkar sekali tekad ai nya ulih dikena nyendiaka bekal kuasa karan ambis kurang ungkup peranak ke dipindahka ngagai palan pengentap pendiau baru nya.

Taja pia, iya madahka perintah enda ngelangkar baru HEP Batang ai tauka Bengoh tang Masing arap endar raban injinir nemu chara bakani nya ulih nyendiaka bekal ai.

“Injinir dilatih landik berunding mutarka penanggul tauka pekara ti baka nya.

“Injinir tu chukup bepeneleba. Sida dilatih ba institusyen antarabansa. Anang ngemaruhka sida,” ku iya.-BP

No comments:

| | Copyright © 2014 SARAWAKIANA