RM161j Udah Diungkup Ke SAWAS Di Menua Pesisir



SIBU: Perintah nengeri udah ngungkupka RM161,500,000 ungkus dikena ngaga 67 bengkah projek Bekal Ai Alternatif Sarawak (SAWAS) ba menua pesisir serata nengeri tu.

Menteri Perengka Guna Mensia Mayuh Datuk Dr Stephen Rundi madah, projek tu ila deka meri penguntung ngagai 1,478 pintu ruang bilik ari 67 bengkah genturung menua.

Ku iya, SAWAS ngembuan tuju deka ngelengkaska pengawa meri ai beresi ngagai menua pesisir.

“Nyentuk ujung taun 2015, 61 peratus menua pesisir udah diberi projek bekal ai beresi. Kebendar iya, projek SAWAS tu bekenaka ungkus RM4.5 billiun kelimpah RM775 juta dikena nganti paip lama,” pia ku iya maya berandau enggau pengarang berita, empai lama tu tadi.

Iya ti mega Kaban Kunsil Nengeri (ADUN) Kemena mantaika penerang tu maya ditanya penyampau menua pesisir deka digaga projek SAWAS taun tu.

Nerang enggau nyemetak agi, ku iya, 14 bengkah projek deka digaga di Mukah, Limbang (11), Bintulu (9), Miri (8), Kapit (6), Sri Aman, Betong, Sarikei (4), Kuching (3), Samarahan enggau Sibu (2).

Kelimpah ari projek nya, Dr Rundi mega madah, Skim Bekal Karan Alternatif Menua Pesisir (SARES) udah dipenyadi bulan Jun tu tadi ngelai perintah nengeri bebendar deka ngempitka agi serak pemansang menua pesisir enggau kandang mengeri.

“Tu mega nyengkaum Program Transformasyen Menua Pesisir (RTP) ti ngembuan tuju deka nyediaka bekal karan ngagai genap iku rayat Sarawak.

“Kitai ditu ulih bekenaka gaya rampa menua baka ai enggau solar ti ulih meri bekal karan ngagai kitai.

“Tekat ai mit tauka besai pemadu engkeman digaga ditu,” ku iya madahka baru.

SARES-chara ke digaga perintah tu bela disukung Sarawak Energy Berhad (SEB) dikena meri bekal karan 24 jam ti bekenaka pemansang teknologi maya hari tu.

Projek tu diungkupka ngagai rayat ke diau di menua pesisir ti jauh sereta tusah deka disambung ngena karan besai.-UB

No comments:

| | Copyright © 2014 SARAWAKIANA