Rintai Nama Kunsilor Ti Udah Dipilih Enda Diubah



BAU: Rintai nama raban kunsilor ke udah dipilih di 24 opis kunsil serata Sarawak enda diubah, ku Menteri Opis Kunsil Kandang Menua Datuk Dr. Sim Kui Huan.

Iya madahka pengawa ngangkat sumpah raban kunsilor udah dipejalaika lalu sida udah ulih berengkah bejalaika tanggungpengawa enggau nadai penanggul.

“Rintai nama enda diubah. Rintai nama enda dianjung ngagai kabinet enggau Astana ngambika diubah.

“Aram berengkah bejalaika tanggungpengawa diatu laban pengawa betalatka sentang pekara nya enda mai penguntung ngagai rayat.

“Enti kita amat deka meri servis ngagai rayat, terima mih utai ke dikemisi. Beri pengarap ngagai rayat laban nuan sigi patut dipilih nyadi kunsilor,” ku iya bejaku ba pengawa ngangkat sumpah raban kunsilor ungkup Opis Kunsil Bau kemari.

Dr Sim, ke mega presiden Parti Sa’ati Rakyat Sarawak (SUPP) engka nimbal tuduh ti madah rintai nama kaunsilor bisi enda dikemendar Tuai Pemegai Menua (TYT) tajapan udah bisi pemendar ari kabinet.

Ngenang kaul bukai, Dr Sim madah opis menteri udah netapka KPI ungkup tetiap kunsilor nyengkaum pinta ngasuh sida meri lumur telefon ngagai semua rayat ke diintu tauka dalam kandang kuasa sida (kunsilor).

Ku iya, kunsilor patut mudah digiga lalu enda ngerari diri ari rayat.

“Tu ketegal kita semua udah ngangkat sumpah lalu besemaya deka meri servis. Enti rayat enda ulih ngiga nuan, bakani nuan deka meri servis lalu nya mih ke dikumbai ngerari diri.

“Kunsilor nyadi raban ketuai ke pemadu semak enggau rayat lalu nuan enda ulih netapka rayat enda ulih ngenamping nuan enggau mudah,’ku iya.

Ngenang sentang rintai nama kunsilor Opis Kunsil Bau, Dr Sim chukup pechaya sida ulih ngemujurka semua tanggungpengawa lalu ngangkatka Bau nyadi mengeri satelit pengudah projek Jalai Besai Pan Borneo tembu.

Bela datai Menteri Muda Opis Kunsil Kandang Menua Datu Dr Penguang Manggil, Sekretari Mendam Bakrie Zaini enggau ADUN Dato Henry Harry Jinep.-UB

No comments:

| | Copyright © 2014 SARAWAKIANA