PRS bepegai tegap ba sempekat komponen BN


KUCHING: Parti Rakyat Sarawak (PRS) tetap bepegai tegap ba sempekat ti dijapai antara parti komponen sebedau Pengawa Bepilih Besai Menua (PRN) ke-11 tu tadi.

Sekretari Besai PRS, Datuk Wilfred Rata Nissom madah sempekat nya bekaul enggau chara ngambi chalun terus Barisan Nasional (BN) masuk BN enti sida menang.

“PRS pechaya nengah sempekat (ti dijapai nya). Enti sema bisi orang ngelanggar sempekat nya, PRS enda salah…..Awakka mensia mayuh meda kediri empu lalu nyadi akim ba pekara nya,” ku iya.

Iya nyebut munyi nya lebuh dipinta nimbal pemutus Parti Pesaka Bumiputera Bersatu (PBB) nerima lima iku Kaban Kunsil Nengeri (ADUN) ke nadai parti masuk PBB.

Pekara tu dipadah Kepala Menteri Datuk Patinggi Tan Sri Adenan Satem ba aum media di Wisma Bapa Malaysia kemari.

“Kami udah mutuska, enggau (sechara principal) peminta lima iku ADUN tu ke dalam PBB.

“Kami deka netapka enggau silik agi ila, sereta bepelasarka atur, sida tu patut nyerahka peminta sida nengah pampang parti ke semak sebedau dianjung ngagai pampang (PBB), lalu nangkan nya ngagai MKT (Majlis Kerja Tertinggi),” ku iya.

Lima iku ADUN nya, Miro Simuh (Serembu), John Ilus (Bukit Semuja), Datuk Gerawat Gala (Mulu), Rosey Yunus (Bekenu) enggau Paulus Palu Gumbang (Batu Danau).

Kelimpah ari nya, tiga iku ari sida tu, iya nya Miro, John enggau Gerawat sigi kala nyadi kaban PBB tang laban maya PRN ke-11 tu tadi, siti nyadi ari atur nyadi chalun terus, raban tu enda tau enda ningkilka diri ari parti sida dulu lalu bediri atas tikit BN Terus (11 Mei 2016).

Baka Paulus enggau Rosey, seduai iya sebedau tu ketuai Parti Tenaga Rakyat Sarawak (Teras).

Adenan ti mega nyadi Chairman BN Sarawak nyamin PBB ke ngembuan kuasa ngempu 45 kerusi DUN berindik ari lima iku ADUN tu masuk PBB, enda ngachau prinsip bekunsi kuasa enggau parti komponen BN Negeri-PRS, Parti Sa’ati Rayat Sarawak (SUPP) sereta Parti Demokratik Progresif Sarawak (SPDP).

No comments:

| | Copyright © 2014 SARAWAKIANA